PSALMI IUXTA HEBR. 96

₁Dominus regnavit exultabit terra

laetabuntur insulae multae

₂nubes et caligo in circuitu eius

iustitia et iudicium firmamentum solii eius

₃ignis ante faciem eius ibit et exuret per circuitum hostes eius

₄apparuerunt fulgora eius orbi vidit et contremuit terra

₅montes sicut cera tabefacti sunt a facie Domini

a facie dominatoris omnis terrae

₆adnuntiaverunt caeli iustitiam eius

et viderunt omnes populi gloriam eius

₇confundantur universi qui serviunt sculptili

qui gloriantur in idolis

adorate eum omnes dii

₈audivit et laetata est Sion

et exultaverunt filiae Iudae propter iudicia tua Domine

₉tu enim Dominus Excelsus super omnem terram

vehementer elevatus es super universos deos

₁₀qui diligitis Dominum odite malum

custodit animas sanctorum suorum de manu impiorum eruet eos

₁₁lux orta est iusto et rectis corde laetitia

₁₂laetamini iusti in Domino

et confitemini memoriae sanctae eius