PSALMI IUXTA HEBR. 95

₁canite Domino canticum novum

canite Domino omnis terra

₂canite Domino benedicite nomini eius

adnuntiate de die in diem salutare eius

₃narrate in gentibus gloriam eius in universis populis mirabilia eius

₄quia magnus Dominus et laudabilis nimis

terribilis est super omnes deos

₅omnes enim dii populorum sculptilia

Dominus autem caelos fecit

₆gloria et decor ante vultum eius

fortitudo et exultatio in sanctuario eius

₇adferte Domino familiae populorum

adferte Domino gloriam et fortitudinem

₈adferte Domino gloriam nomini eius

levate munera et introite in atria eius

₉adorate Dominum in decore sanctuarii

paveat a facie eius omnis terra

₁₀dicite in gentibus Dominus regnavit

siquidem adpendit orbem inmobilem

iudicabit populos in aequitate

₁₁laetamini caeli et exultet terra tonet mare et plenitudo eius

₁₂gaudeat ager et omnia quae in eo sunt

tunc laudabunt universa ligna saltus

₁₃ante faciem Domini quoniam venit

quoniam venit iudicare terram

iudicabit orbem in iusto et

populos in fide sua