PSALMI IUXTA HEBR. 93

₁Deus ultionum Domine Deus ultionum ostendere

₂elevare qui iudicas terram redde vicissitudinem superbis

₃usquequo impii Domine

usquequo impii exultabunt

₄fluent loquentes antiquum

garrient omnes qui operantur iniquitatem

₅populum tuum Domine conterent et hereditatem tuam adfligent

₆viduam et advenam interficient et pupillos occident

₇et dixerunt non videbit Dominus

et non intelleget Deus Iacob

₈intellegite stulti in populo et insipientes aliquando discite

₉qui plantavit aurem non audiet aut qui finxit oculum non videbit

₁₀qui erudit gentes non arguet qui docet hominem scientiam

₁₁Dominus novit cogitationes hominum quia vanae sunt

₁₂beatus vir quem erudieris Domine

et de lege tua docueris eum

₁₃ut quiescat a diebus adflictionis donec fodiatur impio interitus

₁₄non enim derelinquet Dominus populum suum

et hereditatem suam non deseret

₁₅quoniam ad iustitiam revertetur iudicium

et sequentur illud omnes recti corde

₁₆quis stabit pro me adversum malos

quis stabit pro me adversum operarios iniquitatis

₁₇nisi quia Dominus auxiliator meus

paulo minus habitasset in inferno anima mea

₁₈si dicebam commotus est pes meus

misericordia tua Domine sustentabat me

₁₉in multitudine cogitationum mearum quae sunt in me intrinsecus

consolationes tuae delectabunt

animam meam

₂₀numquid particeps erit tui thronus insidiarum

fingens laborem in praecepto

₂₁copulabuntur adversus animam iusti

et sanguinem innocentem condemnabunt

₂₂erit autem Dominus mihi in refugium

et Deus meus quasi petra spei meae

₂₃et restitues super eos iniquitatem suam

et in malitia sua perdes eos

perdet eos Dominus Deus noster