PSALMI IUXTA HEBR. 90

₁qui habitat in abscondito Excelsi

in umbraculo Domini commorabitur

₂dicens Domino spes mea et fortitudo mea

Deus meus confidam in eum

₃quia ipse liberabit te de laqueo venantium

de morte insidiarum

₄in scapulis suis obumbrabit tibi et sub alis eius sperabis

₅scutum et protectio veritas eius non timebis a timore nocturno

₆a sagitta volante per diem a peste in tenebris ambulante

a morsu insanientis meridie

₇cadent a latere tuo mille et decem milia a dextris tuis

ad te autem non adpropinquabit

₈verumtamen oculis tuis videbis et ultionem impiorum cernes

₉tu enim es Domine spes mea Excelsum posuisti habitaculum tuum

₁₀non accedet ad te malum

et lepra non adpropinquabit tabernaculo tuo

₁₁quia angelis suis mandabit de te

ut custodiant te in omnibus viis tuis

₁₂in manibus portabunt te ne forte offendat ad lapidem pes tuus

₁₃super aspidem et basiliscum calcabis

conculcabis leonem et draconem

₁₄quoniam mihi adhesit et liberabo eum

exaltabo eum quoniam cognovit nomen meum

₁₅invocabit me et exaudiam eum

cum ipso ero in tribulatione eruam eum et glorificabo

₁₆longitudine dierum implebo illum

et ostendam ei salutare meum