PSALMI IUXTA HEBR. 8

₁victori pro torcularibus canticum David

₂Domine Dominator noster

quam grande est nomen tuum in universa terra

qui posuisti gloriam tuam super caelos

₃ex ore infantium et lactantium perfecisti laudem

propter adversarios meos ut quiescat inimicus et ultor

₄videbo enim caelos tuos opera digitorum tuorum

lunam et stellas quae fundasti

₅quid est homo quoniam recordaris eius

vel filius hominis quoniam visitas eum

₆minues eum paulo minus a Deo

gloria et decore coronabis eum

₇dabis ei potestatem super opera manuum tuarum

₈cuncta posuisti sub pedibus eius

oves et armenta omnia insuper et animalia agri

₉aves caeli et pisces maris qui pertranseunt semitas

ponti

₁₀Domine Dominator noster

quam grande est nomen tuum in universa terra