PSALMI IUXTA HEBR. 63

₁victori canticum David

₂audi Deus vocem meam loquentis

a timore inimici serva vitam meam

₃absconde me a consilio malignorum

a tumultu operantium iniquitatem

₄qui exacuerunt quasi gladium linguam suam

tetenderunt sagittam suam verbum amarissimum

₅ut sagittarent in absconditis simplicem

₆subito sagittabunt eum et non timebunt

confortaverunt sibi sermonem pessimum

narraverunt ut absconderent laqueos

dixerunt quis videbit nos

₇scrutati sunt iniquitates defecerunt scrutantes scrutinio

cogitationibus singulorum et corde profundo

₈sagittabit ergo eos Deus iaculo repentino

inferentur plagae eorum

₉et corruent in semet ipsos linguis suis

fugient omnes qui viderint eos

₁₀et timebunt omnes homines et adnuntiabunt opus Dei

et opera eius intellegent

₁₁laetabitur iustus in Domino et sperabit in eo

et exultabunt omnes recti corde