PSALMI IUXTA HEBR. 57

₁victori ut non disperdas David humilem et simplicem

₂si vere utique iustitiam loquimini recta iudicate filii hominum

₃etenim in corde iniquitates operamini

in terra iniquitatis manus vestras adpendite

₄alienati sunt peccatores a vulva

erraverunt ab utero loquentes mendacium

₅furor eorum sicut furor serpentis

sicut reguli surdi obturantis aurem suam

₆ut non audiat vocem murmurantium

nec incantatoris incantationes callidas

₇Deus excute dentes eorum ex ore eorum

molares leonum confringe Domine

₈dissolvantur quasi aquae quae defluent

intendet arcum suum donec conterantur

₉quasi vermis tabefactus pertranseant

quasi abortivum mulieris quod non vidit solem

₁₀antequam crescant spinae vestrae in ramnum

quasi viventes quasi in ira tempestas rapiet eas

₁₁laetabitur iustus cum viderit ultionem

pedes suos lavabit in sanguinem impii

₁₂et dicet homo vere fructus est iusto

vere est Deus iudicans in terra