PSALMI IUXTA HEBR. 47

₁canticum psalmi filiorum Core

₂magnus Dominus et laudabilis nimis

in civitate Dei nostri in monte sancto suo

₃specioso germini gaudio universae terrae

monti Sion lateribus aquilonis civitatulae regis magni

₄Deus in domibus eius agnitus est in auxiliando

₅quia ecce reges congregati sunt venerunt simul

₆ipsi videntes sic obstipuerunt conturbati sunt admirati sunt

₇horror possedit eos ibi dolor quasi parturientis

₈in vento uredinis confringes naves maris

₉sicut audivimus ita vidimus

in civitate Dei exercituum in civitate Dei nostri

Deus fundavit eam usque in aeternum semper

₁₀aestimavimus Deus misericordiam tuam in medio templi tui

₁₁secundum nomen tuum Deus

sic laus tua usque ad extremum terrae

iustitia repleta est dextera tua

₁₂laetetur mons Sion

exultent filiae Iudae propter iudicia tua

₁₃circumdate Sion et circumite eam numerate turres eius

₁₄ponite cor vestrum in moenibus separate palatia eius

ut narretis in generatione novissima

₁₅quia ipse Deus Deus noster in saeculum et

in perpetuum

ipse erit dux noster in morte