PSALMI IUXTA HEBR. 45

₁victori filiorum Core pro iuventutibus canticum

₂Deus nostra spes et fortitudo

auxilium in tribulationibus inventus es validum

₃ideo non timebimus cum fuerit translata terra

et concussi montes in corde maris

₄sonantibus et intumescentibus gurgitibus eius

et agitatis montibus in potentia eius semper

₅fluminis divisiones laetificant civitatem Dei

sanctum tabernaculum Altissimi

₆Dominus in medio eius non commovebitur

auxiliabitur ei Deus in ipso ortu matutino

₇conturbatae sunt gentes concussa sunt regna

dedit vocem suam prostrata est terra

₈Dominus exercituum nobiscum

protector noster Deus Iacob semper

₉venite et videte opera Domini quantas posuerit solitudines in terra

₁₀conpescuit bella usque ad extremum terrae

arcum confringet et concidet hastam plaustra conburet igni

₁₁cessate et cognoscite quoniam ego sum Deus

exaltabor in gentibus exaltabor in terra

₁₂Dominus exercituum nobiscum

fortitudo nostra Deus Iacob semper