PSALMI IUXTA HEBR. 28

₁canticum David

adferte Domino filios arietum

₂adferte Domino gloriam et imperium

adferte Domino gloriam nomini eius

adorate Dominum in decore sancto

₃vox Domini super aquas Deus gloriae intonuit

Dominus super aquas multas

₄vox Domini in fortitudine vox Domini in decore

₅vox Domini confringentis cedros

et confringet Dominus cedros Libani

₆et disperget eas quasi vitulus Libani

et Sarion quasi filius rinocerotis

₇vox Domini dividens flammas ignis

₈vox Domini parturire faciens desertum Cades

₉vox Domini obsetricans cervis et revelans saltus

et in templo eius omnis loquetur gloriam

₁₀Dominus diluvium inhabitat et sedebit Dominus rex in aeternum

₁₁Dominus fortitudinem populo suo dabit

Dominus benedicet populo suo in pace