PSALMI IUXTA HEBR. 19

₁victori canticum David

₂exaudiat te Dominus in die tribulationis

protegat te nomen Dei Iacob

₃mittat tibi auxilium de sancto et de Sion roboret te

₄memor sit omnis sacrificii tui

et holocaustum tuum pingue fiat semper

₅det tibi secundum cor tuum et omnem voluntatem tuam impleat

₆laudabimus in salutari tuo

et in nomine Dei nostri ducemus choros

₇impleat Dominus omnes petitiones tuas

nunc scio quoniam salvabit Dominus christum suum

exaudiet eum de caelo sancto suo

in fortitudine salutis dexterae suae

₈hii in curribus et hii in equis

nos autem nominis Domini Dei nostri recordabimur

₉ipsi incurvati sunt et ceciderunt

nos autem resurreximus et erecti sumus

₁₀Domine salva

rex exaudiet nos in die qua invocaverimus