PSALMI IUXTA HEBR. 15

₁humilis et simplicis David

custodi me Deus quoniam speravi in te

₂dicens Deo Dominus meus es tu bene mihi non est sine te

₃sanctis qui in terra sunt et magnificis omnis voluntas mea in eis

₄multiplicabuntur idola eorum post tergum sequentium

non litabo libamina eorum de

sanguine

neque adsumam nomina eorum in labiis meis

₅Dominus pars hereditatis meae et calicis mei

tu possessor sortis meae

₆lineae ceciderunt mihi in pulcherrimis

et hereditas speciosissima mea est

₇benedicam Domino qui dedit consilium mihi

insuper et noctibus erudierunt me renes mei

₈proponebam in conspectu meo semper

quia a dextris meis est ne commovear

₉propterea laetatum est cor meum et exultavit gloria mea

et caro mea habitavit confidenter

₁₀non enim derelinques animam meam in

inferno

nec dabis sanctum tuum videre corruptionem

ostendes mihi semitam vitae

plenitudinem laetitiarum ante vultum tuum

decores in dextera tua aeternos