PSALMI IUXTA HEBR. 108

₁pro victoria David canticum

₂Deus laudabilis mihi ne taceas

quia os impii et os dolosi contra me apertum est

₃locuti sunt de me lingua mendacii

verbis odii circumdederunt me et expugnaverunt me frustra

₄pro eo quod eos diligebam adversabantur mihi

ego autem orabam

₅et posuerunt contra me malum pro bono

et odium pro dilectione mea

₆constitue super eum impium

et Satan astet a

dextris eius

₇cum fuerit iudicatus exeat condemnatus

et oratio eius sit in peccatum

₈fiant dies eius parvi

episcopatum eius accipiat alter

₉sint filii eius pupilli et uxor eius vidua

₁₀instabiles vagentur liberi eius et mendicent

et quaerantur in parietinis suis

₁₁scrutetur exactor universa quae habet

et diripiant alieni laborem eius

₁₂non sit qui eius misereatur nec qui clemens sit in pupillos eius

₁₃fiat novissimum eius interitus

in generatione altera deleatur nomen eius

₁₄redeat in memoria iniquitas patrum eius apud Deum

et iniquitas matris eius ne deleatur

₁₅sit contra Dominum semper

et intereat de terra memoria eorum

₁₆eo quod non est recordatus facere misericordiam

₁₇et persecutus est virum inopem et pauperem

et conpunctum corde ut interficeret

₁₈et dilexit maledictionem quae veniet ei

et noluit benedictionem quae elongabitur ab eo

et indutus est maledictione quasi vestimento suo

et ingredietur quasi aqua in viscera eius

et quasi oleum in ossa eius

₁₉sit ei quasi pallium quo circumdatur

et quasi cingulum quo semper accingitur

₂₀haec est retributio his qui adversantur mihi a Domino

et qui loquuntur malum contra animam meam

₂₁tu autem Deus Domine fac mecum propter

nomen tuum

quoniam bona est misericordia tua libera me

₂₂quoniam egenus et pauper sum

et cor meum vulneratum est intrinsecus

₂₃quasi umbra cum inclinatur abductus sum

et excussus quasi lucusta

₂₄genua mea vacillaverunt a ieiunio

et caro mea mutata est absque oleo

₂₅et ego factus sum obprobrium eis

videntes me moverunt caput suum

₂₆adiuva me Domine Deus meus

salva me secundum misericordiam tuam

₂₇et sciant quoniam manus tua haec tu Domine fecisti eam

₂₈maledicent illi et tu benedices

restiterunt et confundentur servus autem tuus laetabitur

₂₉induantur adversarii mei confusione

et operiantur quasi indumento confusione

sua

₃₀confitebor Domino vehementer in ore meo

et in medio populorum laudabo eum

₃₁quoniam stabit a dextris pauperis

ut salvet a iudicibus animam eius