PSALMI IUXTA HEBR. 107

₁canticum psalmi David

₂paratum cor meum Deus

cantabo et psallam sed et gloria mea

₃consurge psalterium et cithara consurgam mane

₄confitebor tibi in populis Domine et cantabo te in nationibus

₅quoniam magna super caelos misericordia tua

et usque ad aethera veritas tua

₆exaltare super caelos Deus et super omnem terram gloria tua

₇ut liberentur dilecti tui

salva dextera tua et exaudi me

₈Deus locutus est in sanctuario suo

gaudebo dividam Sychem

et vallem Socchoth dimetiar

₉meus est Galaad et meus est Manasse

et Efraim hereditas capitis mei

Iuda dux meus

₁₀Moab lebes pelvis meae

super Idumeam proiciam calciamentum meum

cum Philisthim foederabor

₁₁quis deducet me in civitatem munitam

quis deducet me usque in Idumeam

₁₂nonne tu Deus qui proieceras nos

et non exieras Deus in exercitibus nostris

₁₃da nobis auxilium in tribulatione

vana est enim salus ab homine

₁₄in Deo erimus fortes et ipse conculcabit hostes nostros