PSALMI IUXTA HEBR. 104

₁alleluia confitemini Domino invocate nomen eius

notas facite populis cogitationes eius

₂canite ei et psallite illi

loquimini in universis mirabilibus eius

₃exultate in nomine sancto eius laetetur cor quaerentium Dominum

₄quaerite Dominum et virtutem eius quaerite faciem eius iugiter

₅recordamini mirabilium eius quae fecit

signorum et iudiciorum oris eius

₆semen Abraham servi eius filii Iacob electi eius

₇ipse Dominus Deus noster in universa terra iudicia eius

₈recordatus est in aeternum pacti sui

verbi quod praecepit in mille generationes

₉quod pepigit cum Abraham

et iuramenti sui cum Isaac

₁₀et firmavit illud cum Iacob in lege

cum Israhel pactum sempiternum

₁₁dicens tibi dabo terram Chanaan funiculum hereditatis vestrae

₁₂cum essent viri pauci modici et advenae in ea

₁₃et transierunt de gente in gentem

de regno ad populum alterum

₁₄non dimisit hominem ut noceret eis et corripuit pro eis reges

₁₅nolite tangere christos meos et prophetas meos nolite adfligere

₁₆et vocavit famem super terram omnem virgam panis contrivit

₁₇misit ante faciem eorum virum in servum venundatus est Ioseph

₁₈adflixerunt in conpede pedes eius

in ferrum venit anima eius

₁₉usque ad tempus donec veniret sermo eius

eloquium Domini probavit eum

₂₀misit rex et solvit eum princeps populorum et dimisit illum

₂₁posuit eum dominum domus suae

et principem in omni possessione sua

₂₂ut erudiret principes eius secundum voluntatem suam

et senes eius sapientiam doceret

₂₃et ingressus est Israhel Aegyptum

et Iacob advena fuit in terra Ham

₂₄et crescere fecit populum suum nimis

et roboravit eum super hostes eius

₂₅convertit cor eorum ut odio haberent populum eius

ut dolose agerent contra servos illius

₂₆misit Mosen servum suum Aaron quem elegit sibi

₂₇posuit in eis verba signorum suorum et portentorum in terra Ham

₂₈misit tenebras et contenebravit

et non fuerunt increduli verbis eius

₂₉commutavit aquas eorum in sanguinem

et occidit pisces eorum

₃₀ebullivit terra eorum ranas

in cubiculis regum eorum

₃₁dixit et venit musca omnimoda scinifes in universis terminis eorum

₃₂dedit pluvias eorum grandinem

ignem flammantem in terra eorum

₃₃et percussit vineam eorum et ficum eorum

et confregit lignum finium eorum

₃₄dixit et venit lucusta et bruchus cuius non erat numerus

₃₅et comedit omne faenum terrae eorum

et devoravit fructum terrae eorum

₃₆et percussit omne primogenitum in terra eorum

primitias universi partus eorum

₃₇et eduxit eos cum argento et auro

et non erat in tribubus eorum infirmus

₃₈laetata est Aegyptus cum egrederentur

quoniam inruerat terror eorum super eos

₃₉expandit nubem in tentorium et ignem ut luceret nocte

₄₀petierunt et adduxit ortygometran

et pane caelesti saturavit eos

₄₁aperuit petram et fluxerunt aquae cucurrerunt in aridis flumina

₄₂quia recordatus est verbi sancti sui cum Abraham servo suo

₄₃et eduxit populum suum in laetitia laudantes electos suos

₄₄et dedit eis terras gentium et laborem tribuum possederunt

₄₅ut custodirent caerimonias eius

et leges eius servarent alleluia