PSALMI IUXTA HEBR. 105

₁alleluia confitemini Domino quoniam bonus

quoniam in aeternum misericordia eius

₂quis loquetur fortitudines Domini auditas faciet omnes laudes eius

₃beati qui custodiunt iudicium et faciunt iustitiam in omni tempore

₄recordare mei Domine in repropitiatione populi tui

visita me in salutari tuo

₅ut videam bona electorum tuorum

et laeter in laetitia gentis tuae et exultem cum hereditate tua

₆peccavimus cum patribus nostris inique fecimus impie egimus

₇patres nostri in Aegypto non intellexerunt mirabilia tua

non sunt recordati multitudinis misericordiae tuae

et ad iracundiam provocaverunt super mare in mari Rubro

₈salvavit autem eos propter nomen suum

ut ostenderet fortitudinem suam

₉et comminatus est mari Rubro et aruit

et transduxit eos per abyssos quasi in deserto

₁₀et salvavit eos de manu odientis et redemit eos de manu inimici

₁₁et operuit aqua hostes eorum unus de ipsis non superfuit

₁₂et crediderunt verbis eius cecineruntque laudem eius

₁₃cito obliti sunt operum illius nec expectaverunt voluntatem eius

₁₄et desideraverunt desiderium in deserto

et temptaverunt Deum in solitudine

₁₅dedit ergo eis petitionem eorum

et misit tenuitatem in animam eorum

₁₆et zelati sunt Mosen in castris Aaron sanctum Domini

₁₇aperta est terra et devoravit Dathan

et operuit synagogam Abiram

₁₈et succensus est ignis in synagoga eorum

flamma exusit impios

₁₉fecerunt vitulum in Horeb et adoraverunt conflatile

₂₀et mutaverunt gloriam suam

in similitudine bovis comedentis faenum

₂₁obliti sunt Dei salvatoris sui qui fecit magnalia in Aegypto

₂₂mirabilia in terra Ham terribilia super mare Rubrum

₂₃dixit ergo ut contereret eos

nisi Moses electus eius stetisset medius contra faciem illius

ut converteret indignationem eius et non interficeret

₂₄et dispexerunt terram desiderabilem

nec crediderunt sermoni eius

₂₅et murmuraverunt in tabernaculis suis

non audierunt vocem Domini

₂₆et levavit manum suam super eos

ut deiceret eos in deserto

₂₇et ut deiceret semen eorum in gentibus et dispergeret eos in terris

₂₈et consecrati sunt Beelphegor et comederunt victimas mortuorum

₂₉et concitaverunt eum in studiis suis et percussit eos plaga

₃₀stetit autem Finees et deiudicavit

et est retenta percussio

₃₁et reputatum est ei in iustitia

in generatione et generatione usque in aeternum

₃₂et provocaverunt super aquam Contradictionis

et adflictus est Moses propter eos

₃₃quia provocaverunt spiritum eius

et praecepit labiis suis

₃₄non exterminaverunt populos quos dixit Dominus eis

₃₅et commixti sunt gentibus et didicerunt opera eorum

₃₆et servierunt sculptilibus eorum

et factum est eis in scandalum

₃₇et immolaverunt filios suos et filias suas daemonibus

₃₈et effuderunt sanguinem innocentem

sanguinem filiorum suorum et filiarum suarum

quos immolaverunt sculptilibus Chanaan

et polluta est terra sanguinibus

₃₉et coinquinati sunt in operibus suis et fornicati sunt in studiis suis

₄₀iratus est itaque furor Domini in populum suum

et abominatus est hereditatem suam

₄₁et dedit eos in manu gentium

et dominati sunt eorum qui oderant eos

₄₂et adflixerunt eos inimici sui et humiliati sunt sub manu eorum

₄₃multis vicibus liberavit eos ipsi vero provocabant in consiliis suis

et humiliati sunt propter iniquitates suas

₄₄et vidit tribulationem eorum cum audiret eos rogantes

₄₅et recordatus est pacti sui cum eis

et paenituit eum secundum multitudinem misericordiae suae

₄₆et dedit eos miserabiles coram omnibus qui ceperant eos

₄₇salva nos Domine Deus noster et congrega nos de gentibus

ut confiteamur nomini sancto tuo et canamus laudantes te

₄₈benedictus Dominus Deus Israhel ab aeterno et usque in aeternum

et dicet omnis populus amen

alleluia