PSALMI IUXTA HEBR. 101

₁oratio pauperis quando sollicitus fuerit

et coram Domino fuderit eloquium suum

₂Domine audi orationem meam

et clamor meus ad te veniat

₃ne abscondas faciem tuam a me

in die tribulationis meae inclina ad me aurem tuam

in quacumque die invocavero velociter exaudi me

₄quoniam consumpti sunt sicut fumus dies mei

et ossa mea quasi frixa contabuerunt

₅percussum est quasi faenum et arefactum est cor meum

quia oblitus sum comedere panem meum

₆a voce gemitus mei adhesit os meum carni meae

₇adsimilatus sum pelicano deserti

factus sum quasi bubo solitudinum

₈vigilavi et fui sicut avis solitaria super tectum

₉tota die exprobrabant mihi inimici mei

exultantes per me iurabant

₁₀quia cinerem sicut panem comedi

et potum meum cum fletu miscui

₁₁a facie indignationis et irae tuae

quia elevasti me et adlisisti me

₁₂dies mei quasi umbra inclinati sunt et ego quasi faenum arui

₁₃tu autem Domine in aeternum permanes

memoriale tuum in generatione et generatione

₁₄tu suscitans misereberis Sion

quia tempus est ut miserearis eius

quoniam venit tempus quoniam venit pactum

₁₅quoniam placitos fecerunt servi tui lapides eius

et pulverem eius miserabilem

₁₆et timebunt gentes nomen Domini

et universi reges terrae gloriam tuam

₁₇quia aedificavit Dominus Sion apparuit in gloria sua

₁₈respexit ad orationem vacui et non dispexit orationem eorum

₁₉scribatur hoc in generatione novissima

et populus qui creabitur laudabit Dominum

₂₀quoniam prospexit de excelso sanctuario suo

Dominus de caelo terram contemplatus est

₂₁ut audiret gemitum vincti ut solveret filios mortis

₂₂ut narretur in Sion nomen Domini et laudatio eius in Hierusalem

₂₃cum congregati fuerint populi simul et regna ut serviant Domino

₂₄adflixit in via fortitudinem meam adbreviavit dies meos

₂₅dicam Deus meus ne rapias me in dimidio dierum

meorum

in generatione generationum anni tui

₂₆a principio terram fundasti et opus manuum tuarum caeli

₂₇ipsi peribunt tu autem stabis

et omnes quasi vestimentum adterentur

et quasi pallium mutabis illos et mutabuntur

₂₈tu autem ipse es et anni tui non deficient

₂₉filii servorum tuorum habitabunt

et semen eorum ante faciem eorum perseverabit