PSALMI IUXTA HEBR. 100

₁David canticum

misericordiam et iudicium cantabo tibi Domine psallam

₂erudiar in via perfecta quando venies ad me

ambulabo in simplicitate cordis mei in medio domus meae

₃non ponam coram oculis meis verbum Belial

facientem declinationes odivi nec adhesit mihi

₄cor pravum recedet a me malum nesciam

₅loquentem in abscondito contra proximum suum

hunc interficiam

superbum oculis et altum corde cum hoc esse non potero

₆oculi mei ad fideles terrae ut habitent mecum

ambulans in via simpliciter hic ministrabit mihi

₇non habitabit in medio domus meae faciens dolum

loquens mendacium non placebit in conspectu oculorum meorum

₈mane perdam omnes impios terrae

ut interficiam de civitate Domini universos qui operantur iniquitatem