LIBER PROVERBIORUM 6

₁fili mi si spoponderis pro amico tuo

defixisti apud extraneum manum tuam

₂inlaqueatus es verbis oris tui et captus propriis sermonibus

₃fac ergo quod dico fili mi et temet ipsum libera

quia incidisti in manu proximi tui

discurre festina suscita amicum tuum

₄ne dederis somnum oculis tuis nec dormitent palpebrae tuae

₅eruere quasi dammula de manu

et quasi avis de insidiis aucupis

₆vade ad formicam o piger et considera vias eius

et disce sapientiam

₇quae cum non habeat ducem nec praeceptorem nec principem

₈parat aestate cibum sibi

et congregat in messe quod comedat

₉usquequo piger dormis quando consurges ex somno tuo

₁₀paululum dormies paululum dormitabis

paululum conseres manus ut dormias

₁₁et veniet tibi quasi viator egestas

et pauperies quasi vir armatus

₁₂homo apostata vir inutilis graditur ore perverso

₁₃annuit oculis terit pede digito loquitur

₁₄pravo corde machinatur malum

et in omni tempore iurgia seminat

₁₅huic extemplo veniet perditio sua

et subito conteretur nec habebit ultra medicinam

₁₆sex sunt quae odit Dominus et septimum detestatur anima eius

₁₇oculos sublimes linguam mendacem

manus effundentes innoxium sanguinem

₁₈cor machinans cogitationes pessimas

pedes veloces ad currendum in malum

₁₉proferentem mendacia testem fallacem

et eum qui seminat inter fratres discordias

₂₀conserva fili mi praecepta patris tui

et ne dimittas legem matris tuae

₂₁liga ea in corde tuo iugiter et circumda gutturi tuo

₂₂cum ambulaveris gradiantur tecum

cum dormieris custodiant te et evigilans loquere cum eis

₂₃quia mandatum lucerna est et lex lux

et via vitae increpatio disciplinae

₂₄ut custodiant te a muliere mala

et a blanda lingua extraneae

₂₅non concupiscat pulchritudinem eius cor tuum

nec capiaris nutibus illius

₂₆pretium enim scorti vix unius est panis

mulier autem viri pretiosam animam capit

₂₇numquid abscondere potest homo ignem in sinu suo

ut vestimenta illius non ardeant

₂₈aut ambulare super prunas

et non conburentur plantae eius

₂₉sic qui ingreditur ad mulierem proximi sui

non erit mundus cum tetigerit eam

₃₀non grandis est culpae cum quis furatus fuerit

furatur enim ut esurientem impleat animam

₃₁deprehensus quoque reddet septuplum

et omnem substantiam domus suae tradet

₃₂qui autem adulter est propter cordis inopiam perdet animam suam

₃₃turpitudinem et ignominiam congregat sibi

et obprobrium illius non delebitur

₃₄quia zelus et furor viri non parcet in die vindictae

₃₅nec adquiescet cuiusquam precibus

nec suscipiet pro redemptione dona plurima