LIBER PROVERBIORUM 24

₁ne aemuleris viros malos nec desideres esse cum eis

₂quia rapinas meditatur mens eorum

et fraudes labia eorum loquuntur

₃sapientia aedificabitur domus et prudentia roborabitur

₄in doctrina replebuntur cellaria

universa substantia pretiosa et pulcherrima

₅vir sapiens et fortis est et vir doctus robustus et validus

₆quia cum dispositione initur bellum

et erit salus ubi multa consilia sunt

₇excelsa stulto sapientia in porta non aperiet os suum

₈qui cogitat malefacere stultus vocabitur

₉cogitatio stulti peccatum est

et abominatio hominum detractor

₁₀si desperaveris lassus in die angustiae inminuetur fortitudo tua

₁₁erue eos qui ducuntur ad mortem

et qui trahuntur ad interitum liberare ne cesses

₁₂si dixeris vires non suppetunt

qui inspector est cordis ipse intellegit

et servatorem animae tuae nihil fallit

reddetque homini iuxta opera sua

₁₃comede fili mi mel quia bonum est

et favum dulcissimum gutturi tuo

₁₄sic et doctrina sapientiae animae tuae

quam cum inveneris habebis in novissimis

et spes tua non peribit

₁₅ne insidieris et quaeras impietatem in domo iusti

neque vastes requiem eius

₁₆septies enim cadet iustus et resurget

impii autem corruent in malum

₁₇cum ceciderit inimicus tuus ne gaudeas

et in ruina eius ne exultet cor tuum

₁₈ne forte videat Dominus et displiceat ei

et auferat ab eo iram suam

₁₉ne contendas cum pessimis nec aemuleris impios

₂₀quoniam non habent futurorum spem mali

et lucerna impiorum extinguetur

₂₁time Dominum fili mi et regem

et cum detractoribus non commiscearis

₂₂quoniam repente consurget perditio eorum

et ruinam utriusque quis novit

₂₃haec quoque sapientibus

Cognoscere personam in iudicio non est bonum

₂₄qui dicit impio iustus es

maledicent ei populi et detestabuntur eum

tribus

₂₅qui arguunt laudabuntur et super ipsos veniet benedictio

₂₆labia deosculabitur qui recta verba respondet

₂₇praepara foris opus tuum et diligenter exerce agrum tuum

ut postea aedifices domum tuam

₂₈ne sis testis frustra contra proximum tuum

nec lactes quemquam labiis tuis

₂₉ne dicas quomodo fecit mihi sic faciam ei

reddam unicuique secundum opus suum

₃₀per agrum hominis pigri transivi et per vineam viri stulti

₃₁et ecce totum repleverant urticae

operuerant superficiem eius spinae

et maceria lapidum destructa erat

₃₂quod cum vidissem posui in corde meo

et exemplo didici disciplinam

₃₃parum inquam dormies modicum dormitabis

pauxillum manus conseres ut

quiescas

₃₄et veniet quasi cursor egestas tua

et mendicitas quasi vir armatus