LIBER PROVERBIORUM 22

₁melius est nomen bonum quam divitiae multae

super argentum et aurum gratia bona

₂dives et pauper obviaverunt sibi utriusque operator est Dominus

₃callidus vidit malum et abscondit se

innocens pertransiit et adflictus est damno

₄finis modestiae timor Domini divitiae et gloria et vita

₅arma et gladii in via perversi

custos animae suae longe recedit ab eis

₆proverbium est adulescens iuxta viam suam

etiam cum senuerit non recedet ab ea

₇dives pauperibus imperat

et qui accipit mutuum servus est fenerantis

₈qui seminat iniquitatem metet mala

et virga irae suae consummabitur

₉qui pronus est ad misericordiam benedicetur

de panibus enim suis dedit pauperi

₁₀eice derisorem et exibit cum eo iurgium

cessabuntque causae et contumeliae

₁₁qui diligit cordis munditiam

propter gratiam labiorum suorum habebit amicum regem

₁₂oculi Domini custodiunt scientiam et subplantantur verba iniqui

₁₃dicit piger leo foris

in medio platearum occidendus sum

₁₄fovea profunda os alienae cui iratus est Dominus incidet in eam

₁₅stultitia conligata est in corde pueri

et virga disciplinae fugabit eam

₁₆qui calumniatur pauperem ut augeat divitias suas

dabit ipse ditiori et egebit

₁₇inclina aurem tuam et audi verba sapientium

adpone autem cor ad doctrinam meam

₁₈quae pulchra erit tibi cum servaveris eam in ventre tuo

et redundabit in labiis tuis

₁₉ut sit in Domino fiducia tua

unde et ostendi eam tibi hodie

₂₀ecce descripsi eam tibi tripliciter in cogitationibus et scientia

₂₁ut ostenderem tibi firmitatem

et eloquia veritatis respondere ex his illi

qui misit te

₂₂non facias violentiam pauperi quia pauper est

neque conteras egenum in porta

₂₃quia Dominus iudicabit causam eius

et configet eos qui confixerint animam

eius

₂₄noli esse amicus homini iracundo

neque ambules cum viro furioso

₂₅ne forte discas semitas eius et sumas scandalum animae tuae

₂₆noli esse cum his qui defigunt manus suas

et qui vades se offerunt pro debitis

₂₇si enim non habes unde restituas

quid causae est ut tollat operimentum de cubili tuo

₂₈ne transgrediaris terminos antiquos quos posuerunt patres tui

₂₉vidisti virum velocem in opere suo

coram regibus stabit nec erit ante ignobiles