LIBER NUMERORUM 8

₁locutus est Dominus ad Mosen dicens

₂loquere Aaroni et dices ad eum

cum posueris septem lucernas

contra eam partem quam candelabrum respicit lucere debebunt

₃fecitque Aaron et inposuit lucernas super candelabrum

ut praeceperat Dominus Mosi

₄haec autem erat factura candelabri

ex auro ductili tam medius stipes quam cuncta ex utroque

calamorum latera nascebantur

iuxta exemplum quod ostendit Dominus Mosi

ita operatus est candelabrum

₅et locutus est Dominus ad Mosen dicens

₆tolle Levitas de medio filiorum Israhel

et purificabis eos

₇iuxta hunc ritum

aspergantur aqua lustrationis

et radant omnes pilos carnis suae

cumque laverint vestimenta sua et mundati fuerint

₈tollant bovem de armentis

et libamentum eius similam oleo conspersam

bovem autem alterum de armento tu accipies pro peccato

₉et adplicabis Levitas coram tabernaculo foederis

convocata omni multitudine filiorum Israhel

₁₀cumque Levitae fuerint coram Domino

ponent filii Israhel manus suas super eos

₁₁et offeret Aaron Levitas munus in conspectu Domini a filiis Israhel

ut serviant in ministerio eius

₁₂Levitae quoque ponent manus suas super capita boum

e quibus unum facies pro peccato

et alterum in holocaustum Domini ut depreceris pro eis

₁₃statuesque Levitas in conspectu Aaron et filiorum eius

et consecrabis oblatos Domino

₁₄ac separabis de medio filiorum Israhel ut sint mei

₁₅et postea ingrediantur tabernaculum foederis ut serviant

mihi

sicque purificabis et consecrabis eos in oblationem Domini

quoniam dono donati sunt mihi a filiis Israhel

₁₆pro primogenitis quae aperiunt omnem vulvam in Israhel accepi eos

₁₇mea sunt omnia primogenita filiorum Israhel

tam ex hominibus quam ex iumentis

ex die quo percussi omnem primogenitum in terra Aegypti

sanctificavi eos mihi

₁₈et tuli Levitas pro cunctis primogenitis filiorum Israhel

₁₉tradidique eos dono Aaroni et filiis eius

de medio populi

ut serviant mihi pro Israhel in tabernaculo foederis et orent pro eis

ne sit in populo plaga si ausi fuerint accedere ad sanctuarium

₂₀feceruntque Moses et Aaron et omnis multitudo filiorum Israhel super

Levitas

quae praeceperat Dominus Mosi

₂₁purificatique sunt et laverunt vestimenta sua

elevavitque eos Aaron in conspectu Domini

et oravit pro eis

₂₂ut purificati ingrederentur ad officia sua in tabernaculum foederis

coram Aaron et filiis eius

sicut praeceperat Dominus Mosi de Levitis ita factum est

₂₃locutus est Dominus ad Mosen dicens

₂₄haec est lex Levitarum

a viginti quinque annis et supra ingredientur

ut ministrent in tabernaculo foederis

₂₅cumque quinquagesimum annum aetatis impleverint servire cessabunt

₂₆eruntque ministri fratrum suorum in tabernaculo foederis

ut custodiant quae sibi fuerint commendata

opera autem ipsa non faciant

sic dispones Levitas in custodiis suis