LIBER NUMERORUM 4

₁locutusque est Dominus ad Mosen et Aaron dicens

₂tolle summam filiorum Caath de medio Levitarum

per domos et familias suas

₃a tricesimo anno et supra usque ad quinquagesimum annum

omnium qui ingrediuntur ut stent et ministrent in tabernaculo foederis

₄hic est cultus filiorum Caath

tabernaculum foederis et sanctum sanctorum

₅ingredientur Aaron et filii eius

quando movenda sunt castra

et deponent velum quod pendet ante fores

involventque eo arcam testimonii

₆et operient rursum velamine ianthinarum

pellium

extendentque desuper pallium totum hyacinthinum

et inducent vectes

₇mensam quoque propositionis involvent hyacinthino pallio

et ponent cum ea turibula et mortariola

cyatos et crateras ad liba fundenda

panes semper in ea erunt

₈extendentque desuper pallium coccineum

quod rursum operient velamento ianthinarum pellium

et inducent vectes

₉sument et pallium hyacinthinum

quo operient candelabrum cum lucernis et

forcipibus suis

et emunctoriis et cunctis vasis olei

quae ad concinnandas lucernas necessaria sunt

₁₀et super omnia ponent operimentum ianthinarum pellium

et inducent vectes

₁₁nec non et altare aureum involvent hyacinthino vestimento

et extendent desuper operimentum ianthinarum pellium

inducentque vectes

₁₂omnia vasa quibus ministratur in sanctuario

involvent hyacinthino pallio

et extendent desuper operimentum ianthinarum pellium

inducentque vectes

₁₃sed et altare mundabunt cinere

et involvent illud purpureo vestimento

₁₄ponentque cum eo omnia vasa quibus in ministerio eius utuntur

id est ignium receptacula

fuscinulas ac tridentes uncinos et vatilla

cuncta vasa altaris operient simul velamine ianthinarum pellium

et inducent vectes

₁₅cumque involverint Aaron et filii eius sanctuarium et omnia vasa eius

in commotione castrorum

tunc intrabunt filii Caath ut portent involuta

et non tangant vasa sanctuarii ne moriantur

ista sunt onera filiorum Caath in tabernaculo foederis

₁₆super quos erit Eleazar filius Aaron sacerdotis

ad cuius pertinet curam oleum ad concinnandas lucernas

et conpositionis incensum

et sacrificium quod semper offertur

et oleum unctionis

et quicquid ad cultum tabernaculi pertinet

omniumque vasorum quae in sanctuario sunt

₁₇locutusque est Dominus ad Mosen et Aaron dicens

₁₈nolite perdere populum Caath de medio Levitarum

₁₉sed hoc facite eis ut vivant et non moriantur

si tetigerint sancta sanctorum

Aaron et filii eius intrabunt ipsique disponent opera singulorum

et divident quid portare quis debeat

₂₀alii nulla curiositate videant quae sunt in sanctuario

priusquam involvantur

alioquin morientur

₂₁locutus est Dominus ad Mosen dicens

₂₂tolle summam etiam filiorum Gerson

per domos ac familias et cognationes suas

₂₃a triginta annis et supra usque ad annos quinquaginta numera

omnes qui ingrediuntur et ministrant in tabernaculo foederis

₂₄hoc est officium familiae Gersonitarum

₂₅ut portent cortinas tabernaculi et tectum foederis

operimentum aliud et super omnia velamen ianthinum

tentoriumque quod pendet in introitu foederis tabernaculi

₂₆cortinas atrii et velum in introitu quod est ante tabernaculum

omnia quae ad altare pertinent funiculos et vasa ministerii

₂₇iubente Aaron et filiis eius portabunt filii Gerson

et scient singuli cui debeant oneri

mancipari

₂₈hic est cultus familiae Gersonitarum in tabernaculo foederis

eruntque sub manu Ithamar filii Aaron sacerdotis

₂₉filios quoque Merari per familias et domos patrum suorum recensebis

₃₀a triginta annis et supra usque ad annos quinquaginta

omnes qui ingrediuntur ad officium ministerii sui et cultum foederis

testimonii

₃₁haec sunt onera eorum

portabunt tabulas tabernaculi et vectes eius

columnas et bases earum

₃₂columnas quoque atrii per circuitum

cum basibus et paxillis et funibus suis

omnia vasa et supellectilem ad numerum accipient sicque portabunt

₃₃hoc est officium familiae Meraritarum

et ministerium in tabernaculo foederis

eruntque sub manu Ithamar filii Aaron sacerdotis

₃₄recensuerunt igitur Moses et Aaron et principes synagogae

filios Caath per cognationes et domos patrum suorum

₃₅a triginta annis et supra

usque ad annum quinquagesimum

omnes qui ingrediuntur ad ministerium tabernaculi foederis

₃₆et inventi sunt duo milia septingenti quinquaginta

₃₇hic est numerus populi Caath qui intrat tabernaculum foederis

hos numeravit Moses et Aaron

iuxta sermonem Domini per manum Mosi

₃₈numerati sunt et filii Gerson

per cognationes et domos patrum suorum

₃₉a triginta annis et supra usque ad annum quinquagesimum

omnes qui ingrediuntur ut ministrent in tabernaculo foederis

₄₀et inventi sunt duo milia sescenti triginta

₄₁hic est populus Gersonitarum

quos numeraverunt Moses et Aaron iuxta verbum Domini

₄₂numerati sunt et filii Merari

per cognationes et domos patrum suorum

₄₃a triginta annis et supra usque ad annum quinquagesimum

omnes qui ingrediuntur ad explendos ritus tabernaculi foederis

₄₄et inventi sunt tria milia ducenti

₄₅hic est numerus filiorum Merari quos recensuerunt Moses et Aaron

iuxta imperium Domini per manum Mosi

₄₆omnes qui recensiti sunt de Levitis

et quos fecit ad nomen Moses et Aaron et principes Israhel

per cognationes et domos patrum suorum

₄₇a triginta annis et supra usque ad annum quinquagesimum

ingredientes ad ministerium tabernaculi et onera portanda

₄₈fuerunt simul octo milia quingenti octoginta

₄₉iuxta verbum Domini recensuit eos Moses

unumquemque iuxta officium et onera sua

sicut praeceperat ei Dominus