LIBER NUMERORUM 35

₁haec quoque locutus est Dominus ad Mosen

in campestribus Moab super Iordanem contra Hiericho

₂praecipe filiis Israhel ut dent Levitis de possessionibus suis

₃urbes ad habitandum et suburbana earum per circuitum

ut ipsi in oppidis maneant

et suburbana sint pecoribus ac iumentis

₄quae a muris civitatum forinsecus per circuitum

mille passuum spatio tendentur

₅contra orientem duo milia erunt cubiti

et contra meridiem similiter duo milia

ad mare quoque quod respicit occidentem eadem

mensura erit

et septentrionalis plaga aequali termino finietur

eruntque urbes in medio et foris suburbana

₆de ipsis autem oppidis quae Levitis dabitis

sex erunt in fugitivorum auxilia separata

ut fugiat ad ea qui fuderit sanguinem

exceptis his alia quadraginta duo oppida

₇id est simul quadraginta octo cum suburbanis suis

₈ipsaeque urbes quae dabuntur de possessionibus filiorum

Israhel

ab his qui plus habent plures auferentur et qui minus pauciores

singuli iuxta mensuram hereditatis suae dabunt oppida Levitis

₉ait Dominus ad Mosen

₁₀loquere filiis Israhel et dices ad eos

quando transgressi fueritis Iordanem in terram Chanaan

₁₁decernite quae urbes esse debeant in praesidia fugitivorum

qui nolentes sanguinem fuderint

₁₂in quibus cum fuerit profugus

cognatus occisi eum non poterit occidere

donec stet in conspectu multitudinis et causa illius iudicetur

₁₃de ipsis autem urbibus quae ad fugitivorum subsidia separantur

₁₄tres erunt trans Iordanem et tres in terra Chanaan

₁₅tam filiis Israhel quam advenis atque peregrinis

ut confugiat ad eas qui nolens sanguinem fuderit

₁₆si quis ferro percusserit

et mortuus fuerit qui percussus est

reus erit homicidii et ipse morietur

₁₇si lapidem iecerit et ictus occubuerit similiter punietur

₁₈si ligno percussus interierit percussoris sanguine vindicabitur

₁₉propinquus occisi homicidam interficiet

statim ut adprehenderit eum percutiet

₂₀si per odium quis hominem inpulerit

vel iecerit quippiam in eum per insidias

₂₁aut cum esset inimicus manu percusserit et ille mortuus fuerit

percussor homicidii reus erit

cognatus occisi statim ut invenerit eum iugulabit

₂₂quod si fortuito et absque odio

₂₃et inimicitiis

quicquam horum fecerit

₂₄et hoc audiente populo fuerit conprobatum

atque inter percussorem et propinquum sanguinis quaestio ventilata

₂₅liberabitur innocens de ultoris manu

et reducetur per sententiam in urbem ad quam confugerat

manebitque ibi donec sacerdos magnus qui oleo sancto unctus est moriatur

₂₆si interfector extra fines urbium quae exulibus deputatae sunt

₂₇fuerit inventus

et percussus ab eo qui ultor est sanguinis

absque noxa erit qui eum occiderit

₂₈debuerat enim profugus usque ad mortem pontificis in urbe residere

postquam autem ille obierit homicida revertetur in terram suam

₂₉haec sempiterna erunt et legitima in cunctis habitationibus vestris

₃₀homicida sub testibus punietur

ad unius testimonium nullus condemnabitur

₃₁non accipietis pretium ab eo qui reus est sanguinis

statim et ipse morietur

₃₂exules et profugi ante mortem pontificis nullo modo in urbes suas

reverti poterunt

₃₃ne polluatis terram habitationis vestrae

quae insontium cruore maculatur

nec aliter expiari potest

nisi per eius sanguinem qui alterius sanguinem fuderit

₃₄atque ita emundabitur vestra possessio

me commorante vobiscum

ego enim sum Dominus qui habito inter filios Israhel