LIBER NUMERORUM 2

₁locutusque est Dominus ad Mosen et Aaron dicens

₂singuli per turmas signa atque vexilla et domos cognationum suarum

castrametabuntur filiorum Israhel

per gyrum tabernaculi foederis

₃ad orientem Iudas figet tentoria per turmas exercitus sui

eritque princeps filiorum eius Naasson filius Aminadab

₄et omnis de stirpe eius summa pugnantium

septuaginta quattuor milia sescentorum

₅iuxta eum castrametati sunt de tribu Isachar

quorum princeps fuit Nathanahel filius Suar

₆et omnis numerus pugnatorum eius

quinquaginta quattuor milia quadringenti

₇in tribu Zabulon princeps fuit Heliab filius Helon

₈omnis de stirpe eius exercitus pugnatorum

quinquaginta septem milia quadringenti

₉universi qui in castris Iudae adnumerati sunt

fuerunt centum octoginta sex milia quadringenti

et per turmas suas primi egredientur

₁₀in castris filiorum Ruben ad meridianam plagam

erit princeps Elisur filius Sedeur

₁₁et cunctus exercitus pugnatorum eius qui numerati sunt

quadraginta sex milia quingenti

₁₂iuxta eum castrametati sunt de tribu Symeon

quorum princeps fuit Salamihel filius Surisaddai

₁₃et cunctus exercitus pugnatorum eius qui numerati sunt

quinquaginta novem milia trecenti

₁₄in tribu Gad princeps fuit Heliasaph filius Duhel

₁₅et cunctus exercitus pugnatorum eius qui numerati sunt

quadraginta quinque milia sescenti quinquaginta

₁₆omnes qui recensiti sunt in castris Ruben

centum quinquaginta milia et mille quadringenti quinquaginta

per turmas suas in secundo loco proficiscentur

₁₇levabitur autem tabernaculum testimonii

per officia Levitarum et turmas eorum

quomodo erigetur ita et deponetur

singuli per loca et ordines suos proficiscentur

₁₈ad occidentalem plagam erunt castra filiorum Ephraim

quorum princeps fuit Helisama filius Ammiud

₁₉cunctus exercitus pugnatorum eius qui numerati sunt

quadraginta milia quingenti

₂₀et cum eis tribus filiorum Manasse

quorum princeps fuit Gamalihel filius Phadassur

₂₁cunctus exercitus pugnatorum eius qui numerati sunt

triginta duo milia ducenti

₂₂in tribu filiorum Beniamin princeps fuit Abidan filius Gedeonis

₂₃et cunctus exercitus pugnatorum eius qui recensiti sunt

triginta quinque milia quadringenti

₂₄omnes qui numerati sunt in castris Ephraim

centum octo milia centum

per turmas suas tertii proficiscentur

₂₅ad aquilonis partem castrametati sunt filii Dan

quorum princeps fuit Ahiezer filius Amisaddai

₂₆cunctus exercitus pugnatorum eius qui numerati sunt

sexaginta duo milia septingenti

₂₇iuxta eum fixere tentoria de tribu Aser

quorum princeps fuit Phegihel filius Ochran

₂₈cunctus exercitus pugnatorum eius qui numerati sunt

quadraginta milia et mille quingenti

₂₉de tribu filiorum Nepthalim princeps fuit Ahira filius Henan

₃₀cunctus exercitus pugnatorum eius

quinquaginta tria milia quadringenti

₃₁omnes qui numerati sunt in castris Dan

fuerunt centum quinquaginta septem milia sescenti

et novissimi proficiscentur

₃₂hic numerus filiorum Israhel

per domos cognationum suarum et turmas divisi exercitus

sescenta tria milia quingenti quinquaginta

₃₃Levitae autem non sunt numerati inter filios Israhel

sic enim praecepit Dominus Mosi

₃₄feceruntque filii Israhel iuxta omnia quae mandaverat Dominus

castrametati sunt per turmas suas

et profecti per familias ac domos patrum suorum