LIBER NUMERORUM 1

₁Locutusque est Dominus ad Mosen in deserto Sinai

in tabernaculo foederis

prima die mensis secundi

anno altero egressionis eorum ex Aegypto dicens

₂tollite summam universae congregationis filiorum Israhel

per cognationes et domos suas et nomina singulorum

quicquid sexus est masculini

₃a vicesimo anno et supra omnium virorum fortium ex Israhel

et numerabitis eos per turmas suas tu et Aaron

₄eruntque vobiscum principes tribuum ac domorum in cognationibus suis

₅quorum ista sunt nomina

de Ruben Elisur filius Sedeur

₆de Symeon Salamihel filius Surisaddai

₇de Iuda Naasson filius Aminadab

₈de Isachar Nathanahel filius Suar

₉de Zabulon Heliab filius Helon

₁₀filiorum autem Ioseph

de Ephraim Helisama filius Ammiud

de Manasse Gamalihel filius Phadassur

₁₁de Beniamin Abidan filius Gedeonis

₁₂de Dan Ahiezer filius Amisaddai

₁₃de Aser Phegihel filius Ochran

₁₄de Gad Heliasaph filius Duhel

₁₅de Nepthali Ahira filius Henan

₁₆hii nobilissimi principes multitudinis

per tribus et cognationes suas et capita exercitus Israhel

₁₇quos tulerunt Moses et Aaron cum omni vulgi multitudine

₁₈et congregaverunt primo die mensis secundi

recensentes eos per cognationes et domos ac familias et capita et

nomina singulorum

a vicesimo anno et supra

₁₉sicut praeceperat Dominus Mosi

numeratique sunt in deserto Sinai

₂₀de Ruben primogenito Israhelis

per generationes et familias ac domos suas et nomina capitum singulorum

omne quod sexus est masculini a vicesimo anno et supra

procedentium ad bellum

₂₁quadraginta sex milia quingenti

₂₂de filiis Symeon per generationes et familias ac domos cognationum

suarum

recensiti sunt per nomina et capita singulorum

omne quod sexus est masculini a vicesimo anno et supra

procedentium ad bellum

₂₃quinquaginta novem milia trecenti

₂₄de filiis Gad per generationes et familias ac domos cognationum suarum

recensiti sunt per nomina singulorum a viginti annis et supra

omnes qui ad bella procederent

₂₅quadraginta quinque milia sescenti quinquaginta

₂₆de filiis Iuda per generationes et familias ac domos cognationum suarum

per nomina singulorum a vicesimo anno et supra

omnes qui poterant ad bella procedere

₂₇recensiti sunt septuaginta quattuor milia sescenti

₂₈de filiis Isachar per generationes et familias ac domos cognationum

suarum

per nomina singulorum a vicesimo anno et supra

omnes qui ad bella procederent

₂₉recensiti sunt quinquaginta quattuor milia quadringenti

₃₀de filiis Zabulon per generationes et familias ac domos cognationum

suarum

recensiti sunt per nomina singulorum a vicesimo anno et supra

omnes qui poterant ad bella procedere

₃₁quinquaginta septem milia quadringenti

₃₂de filiis Ioseph filiorum Ephraim

per generationes et familias ac domos cognationum

suarum

recensiti sunt per nomina singulorum a vicesimo anno et supra

omnes qui poterant ad bella procedere

₃₃quadraginta milia quingenti

₃₄porro filiorum Manasse

per generationes et familias ac domos cognationum suarum

recensiti sunt per nomina singulorum

a viginti annis et supra

omnes qui poterant ad bella procedere

₃₅triginta duo milia ducenti

₃₆de filiis Beniamin per generationes et familias ac domos cognationum

suarum

recensiti sunt nominibus singulorum a vicesimo anno et supra

omnes qui poterant ad bella procedere

₃₇triginta quinque milia quadringenti

₃₈de filiis Dan per generationes et familias ac domos cognationum suarum

recensiti sunt nominibus singulorum a vicesimo anno et supra

omnes qui poterant ad bella procedere

₃₉sexaginta duo milia septingenti

₄₀de filiis Aser per generationes et familias ac domos cognationum suarum

recensiti sunt per nomina singulorum a vicesimo anno et supra

omnes qui poterant ad bella procedere

₄₁quadraginta milia et mille quingenti

₄₂de filiis Nepthali per generationes et familias ac domos cognationum

suarum

recensiti sunt nominibus singulorum a vicesimo anno et supra

omnes qui poterant ad bella procedere

₄₃quinquaginta tria milia quadringenti

₄₄hii sunt quos numeraverunt Moses et Aaron et duodecim

principes Israhel

singulos per domos cognationum suarum

₄₅fueruntque omnes filiorum Israhel

per domos et familias suas a vicesimo anno et supra

qui poterant ad bella procedere

₄₆sescenta tria milia virorum quingenti quinquaginta

₄₇Levitae autem in tribu familiarum suarum non sunt numerati

cum eis

₄₈locutusque est Dominus ad Mosen dicens

₄₉tribum Levi noli numerare

neque ponas summam eorum cum filiis Israhel

₅₀sed constitue eos super tabernaculum testimonii

cuncta vasa eius et quicquid ad caerimonias pertinet

ipsi portabunt tabernaculum et omnia utensilia eius

et erunt in ministerio

ac per gyrum tabernaculi metabuntur

₅₁cum proficiscendum fuerit deponent Levitae tabernaculum

cum castra metanda erigent

quisquis externorum accesserit occidetur

₅₂metabuntur autem castra filii Israhel

unusquisque per turmas et cuneos atque exercitum suum

₅₃porro Levitae per gyrum tabernaculi figent tentoria

ne fiat indignatio super multitudinem filiorum Israhel

et excubabunt in custodiis tabernaculi testimonii

₅₄fecerunt ergo filii Israhel iuxta omnia quae praeceperat Dominus Mosi