MICHA PROPHETA 4

₁et in novissimo dierum erit mons domus Domini

praeparatus in vertice montium et sublimis super colles

et fluent ad eum populi

₂et properabunt gentes multae et dicent

venite ascendamus ad montem Domini et ad domum Dei Iacob

et docebit nos de viis suis et ibimus in semitis eius

quia de Sion egredietur lex et verbum Domini de Hierusalem

₃et iudicabit inter populos multos

et corripiet gentes fortes usque in longinquum

et concident gladios suos in vomeres et hastas suas in ligones

non sumet gens adversus gentem gladium

et non discent ultra belligerare

₄et sedebit vir subtus vineam suam et

subtus ficum suam

et non erit qui deterreat

quia os Domini exercituum locutum est

₅quia omnes populi ambulabunt unusquisque in nomine dei sui

nos autem ambulabimus in nomine Domini Dei nostri

in aeternum et ultra

₆in die illa dicit Dominus congregabo claudicantem

et eam quam eieceram colligam et quam adflixeram

₇et ponam claudicantem in reliquias

et eam quae laboraverat in gentem robustam

et regnabit Dominus super eos in monte Sion

ex hoc nunc et usque in aeternum

₈et tu turris Gregis nebulosa filiae Sion

usque ad te veniet

et veniet potestas prima regnum filiae Hierusalem

₉nunc quare maerore contraheris

numquid rex non est tibi aut consiliarius tuus periit

quia conprehendit te dolor sicut parturientem

₁₀dole et satage filia Sion quasi parturiens

quia nunc egredieris de civitate et habitabis in regione

et venies usque ad Babylonem

ibi liberaberis ibi redimet te Dominus de manu inimicorum tuorum

₁₁et nunc congregatae sunt super te gentes multae

quae dicunt lapidetur et aspiciat in Sion oculus noster

₁₂ipsi autem non cognoverunt cogitationes Domini

et non intellexerunt consilium eius

quia congregavit eos quasi faenum areae

₁₃surge et tritura filia Sion quia cornu tuum ponam ferreum

et ungulas tuas ponam aereas et comminues populos multos

et interficiam Domino rapinas eorum

et fortitudinem eorum Domino universae terrae