ORATIO MANASSE 1

₁Domine Deus omnipotens patrum nostrorum, Abraham, Isaac et Iacob et semini eorum iusto, ₂qui fecisti caelum et terram cum omni ornatu eorum, ₃qui signasti mare verbo praecepti tui, qui conclusisti abyssum et signasti terribili et laudabili nomini tuo, ₄quod omnes pavent et tremunt a vultu virtutis tuae. ₅Et insustentabilis ira super peccatores comminationis tuae, ₆inmensa vero et investigabilis misericordia promissionis tuae, ₇quoniam tu es Dominus altissimus super omnem terram, longanimis et multum misericors et paenitens super malitias hominum.

Tu autem Domine, secundum bonitatem tuam promisisti paenitentiam remissionis peccatorum.

₈Et tu Deus iustorum, non posuisti paenitentiam iustis Abraham, Isaac et Iacob, his qui tibi non peccaverunt. ₉Quoniam peccavi super numerum harenae maris, multiplicatae sunt iniquitates meae. ₁₀Incurvatus sum multo vinculo ferri et non est respiratio mihi, quia excitavi iracundiam tuam et malum coram te feci, statuens abominationes et multiplicans offensiones.

₁₁Et nunc flecto genua cordis mei, precans ad te bonitatem, Domine. ₁₂Peccavi Domine, peccavi et iniquitatem meam agnosco. ₁₃Peto rogans te Domine remitte mihi, remitte mihi, ne simul perdas me cum iniquitatibus meis neque in aeternum reserves mala mihi, ₁₄quia indignum salvabis me secundum magnam misericordiam tuam. ₁₅Et laudabo te semper omnibus diebus vitae meae quoniam te laudat omnis virtus caelorum et tibi est gloria in saecula saeculorum. Amen.