LIBER LEVITICI 1

₁Vocavit autem Mosen

et locutus est ei Dominus de tabernaculo testimonii dicens

₂loquere filiis Israhel et dices ad eos

homo qui obtulerit ex vobis hostiam Domino de pecoribus

id est de bubus et ovibus offerens victimas

₃si holocaustum fuerit eius oblatio ac de armento

masculum inmaculatum offeret ad ostium tabernaculi testimonii

ad placandum sibi Dominum

₄ponetque manus super caput hostiae

et acceptabilis erit atque in expiationem eius proficiens

₅immolabitque vitulum coram Domino

et offerent filii Aaron sacerdotes sanguinem eius

fundentes super altaris circuitum

quod est ante ostium tabernaculi

₆detractaque pelle hostiae artus in frusta concident

₇et subicient in altari ignem strue lignorum ante conposita

₈et membra quae caesa sunt desuper ordinantes

caput videlicet et cuncta quae adherent iecori

₉intestinis et pedibus lotis aqua

adolebitque ea sacerdos super altare

in holocaustum et suavem odorem Domino

₁₀quod si de pecoribus oblatio est

de ovibus sive de capris holocaustum

anniculum et absque macula offeret

₁₁immolabitque ad latus altaris

quod respicit ad aquilonem coram Domino

sanguinem vero illius fundent super altare filii Aaron per circuitum

₁₂dividentque membra caput et omnia quae adherent iecori

et inponent super ligna quibus subiciendus est ignis

₁₃intestina vero et pedes lavabunt aqua

et oblata omnia adolebit sacerdos super altare

in holocaustum et odorem suavissimum Domino

₁₄sin autem de avibus holocausti oblatio fuerit Domino

de turturibus et pullis columbae

₁₅offeret eam sacerdos ad altare

et retorto ad collum capite ac rupto vulneris loco

decurrere faciet sanguinem super crepidinem altaris

₁₆vesiculam vero gutturis et plumas proiciet propter

altare

ad orientalem plagam in loco in quo cineres effundi solent

₁₇confringetque ascellas eius

et non secabit nec ferro dividet eam

et adolebit super altare lignis igne subposito

holocaustum est et oblatio suavissimi odoris Domino