LIBER IOB 8

₁respondens autem Baldad Suites dixit

₂usquequo loqueris talia

et spiritus multiplex sermones oris tui

₃numquid Deus subplantat iudicium

et Omnipotens subvertit quod iustum est

₄etiam si filii tui peccaverunt ei

et dimisit eos in manu iniquitatis suae

₅tu tamen si diluculo consurrexeris ad Deum

et Omnipotentem fueris deprecatus

₆si mundus et rectus incesseris statim evigilabit ad te

et pacatum reddet habitaculum iustitiae tuae

₇in tantum ut priora tua fuerint parva

et novissima tua multiplicentur nimis

₈interroga enim generationem pristinam

et diligenter investiga patrum memoriam

₉hesterni quippe sumus

et ignoramus quoniam sicut umbra dies nostri sunt super terram

₁₀et ipsi docebunt te loquentur tibi

et de corde suo proferent eloquia

₁₁numquid vivere potest scirpus absque

humore

aut crescet carectum sine aqua

₁₂cum adhuc sit in flore nec carpatur manu

ante omnes herbas arescit

₁₃sic viae omnium qui obliviscuntur Deum

et spes hypocritae peribit

₁₄non ei placebit vecordia sua et sicut tela aranearum fiducia eius

₁₅innitetur super domum suam et non stabit

fulciet eam et non consurget

₁₆humectus videtur antequam veniat sol

et in horto suo germen eius egreditur

₁₇super acervum petrarum radices eius densabuntur

et inter lapides commorabitur

₁₈si absorbuerit eum de loco suo negabit eum et dicet non novi te

₁₉haec est enim laetitia viae eius

ut rursum de terra alii germinentur

₂₀Deus non proiciet simplicem nec porriget manum malignis

₂₁donec impleatur risu os tuum et labia tua iubilo

₂₂qui oderunt te induentur confusione et tabernaculum impiorum non subsistet