LIBER IOB 3

₁post haec aperuit Iob os suum

et maledixit diei suo

₂et locutus est

₃pereat dies in qua natus sum

et nox in qua dictum est conceptus est homo

₄dies ille vertatur in tenebras

non requirat eum Deus desuper et non inlustret lumine

₅obscurent eum tenebrae et umbra mortis

occupet eum caligo et involvatur amaritudine

₆noctem illam tenebrosus turbo possideat

non conputetur in diebus anni nec numeretur in mensibus

₇sit nox illa solitaria nec laude digna

₈maledicant ei qui maledicunt diei

qui parati sunt suscitare Leviathan

₉obtenebrentur stellae caligine eius

expectet lucem et non videat nec ortum surgentis aurorae

₁₀quia non conclusit ostia ventris qui portavit me

nec abstulit mala ab oculis meis

₁₁quare non in vulva mortuus sum

egressus ex utero non statim perii

₁₂quare exceptus genibus cur lactatus uberibus

₁₃nunc enim dormiens silerem et somno meo requiescerem

₁₄cum regibus et consulibus terrae qui aedificant sibi solitudines

₁₅aut cum principibus qui possident aurum

et replent domos suas argento

₁₆aut sicut abortivum absconditum non subsisterem

vel qui concepti non viderunt lucem

₁₇ibi impii cessaverunt a tumultu et ibi requieverunt fessi robore

₁₈et quondam vincti pariter sine molestia

non audierunt vocem exactoris

₁₉parvus et magnus ibi sunt et servus liber a domino suo

₂₀quare data est misero lux

et vita his qui in amaritudine animae sunt

₂₁qui expectant mortem et non venit quasi effodientes thesaurum

₂₂gaudentque vehementer cum invenerint sepulchrum

₂₃viro cuius abscondita est via et circumdedit eum Deus tenebris

₂₄antequam comedam suspiro

et quasi inundantes aquae sic rugitus meus

₂₅quia timor quem timebam evenit mihi et quod verebar accidit

₂₆nonne dissimulavi nonne silui nonne quievi

et venit super me indignatio