LIBER IOB 24

₁ab Omnipotente non sunt abscondita tempora

qui autem noverunt eum ignorant dies illius

₂alii terminos transtulerunt diripuerunt greges et paverunt eos

₃asinum pupillorum abigerunt

et abstulerunt pro pignore bovem viduae

₄subverterunt pauperum viam

et oppresserunt pariter mansuetos terrae

₅alii quasi onagri in deserto egrediuntur ad opus suum

vigilantesque ad

praedam praeparant panem liberis

₆agrum non suum demetunt

et vineam eius quem vi oppresserunt vindemiant

₇nudos dimittunt homines

indumenta tollentes quibus non est operimentum in frigore

₈quos imbres montium rigant

et non habentes velamen amplexantur lapides

₉vim fecerunt depraedantes pupillos

et vulgum pauperem spoliaverunt

₁₀nudis et incedentibus absque vestitu et esurientibus tulerunt spicas

₁₁inter acervos eorum meridiati sunt qui calcatis torcularibus sitiunt

₁₂de civitatibus fecerunt viros gemere

et anima vulneratorum clamavit

et Deus inultum abire non patitur

₁₃ipsi fuerunt rebelles luminis nescierunt vias eius

nec reversi sunt per semitas illius

₁₄mane primo consurgit homicida interficit

egenum et pauperem

per noctem vero erit quasi fur

₁₅oculus adulteri observat caliginem dicens non me videbit oculus

et operiet vultum suum

₁₆perfodit in tenebris domos sicut in die

condixerant sibi et ignoraverunt lucem

₁₇si subito apparuerit aurora arbitrantur umbram mortis

et sic in tenebris quasi in luce ambulant

₁₈levis est super faciem aquae

maledicta sit pars eius in terra nec ambulet per viam vinearum

₁₉ad nimium calorem transeat ab aquis nivium

et usque ad inferos peccatum illius

₂₀obliviscatur eius misericordia dulcedo illius vermes

non sit in recordatione sed conteratur quasi lignum infructuosum

₂₁pavit enim sterilem et quae non parit

et viduae bene non fecit

₂₂detraxit fortes in fortitudine sua

et cum steterit non credet vitae suae

₂₃dedit ei Deus locum paenitentiae

et ille abutitur eo in superbiam

oculi autem eius sunt in viis illius

₂₄elevati sunt ad modicum et non subsistent

et humiliabuntur sicut omnia et auferentur

et sicut summitates spicarum conterentur

₂₅quod si non est ita quis me potest arguere esse mentitum

et ponere ante Deum verba mea