LIBER IOB 15

₁respondens autem Eliphaz Themanites dixit

₂numquid sapiens respondebit quasi in ventum loquens

et implebit ardore stomachum suum

₃arguis verbis eum qui non est aequalis tui

et loqueris quod tibi non expedit

₄quantum in te est evacuasti timorem et tulisti preces coram Deo

₅docuit enim iniquitas tua os tuum

et imitaris linguam blasphemantium

₆condemnabit te os tuum et non ego et labia tua respondebunt tibi

₇numquid primus homo tu natus es et ante colles formatus

₈numquid consilium Dei audisti et inferior te erit eius sapientia

₉quid nosti quod ignoremus quid intellegis quod nesciamus

₁₀et senes et antiqui sunt in nobis multo vetustiores quam patres tui

₁₁numquid grande est ut consoletur te Deus

sed verba tua prava hoc prohibent

₁₂quid te elevat cor tuum

et quasi magna cogitans adtonitos habes oculos

₁₃quid tumet contra Deum spiritus tuus

ut proferas de ore huiuscemodi sermones

₁₄quid est homo ut inmaculatus sit

et ut iustus appareat natus de muliere

₁₅ecce inter sanctos eius nemo inmutabilis

et caeli non sunt mundi in conspectu eius

₁₆quanto magis abominabilis et inutilis homo

qui bibit quasi aquas iniquitatem

₁₇ostendam tibi audi me quod vidi narrabo tibi

₁₈sapientes confitentur et non abscondunt patres suos

₁₉quibus solis data est terra

et non transibit alienus per eos

₂₀cunctis diebus suis impius superbit

et numerus annorum incertus est tyrannidis eius

₂₁sonitus terroris semper in auribus illius

et cum pax sit ille insidias suspicatur

₂₂non credit quod reverti possit de tenebris

circumspectans undique gladium

₂₃cum se moverit ad quaerendum panem

novit quod paratus sit in manu eius tenebrarum dies

₂₄terrebit eum tribulatio et angustia

vallabit eum sicut regem qui praeparatur ad proelium

₂₅tetendit enim adversus Deum manum suam

et contra Omnipotentem roboratus est

₂₆cucurrit adversus eum erecto collo et pingui cervice armatus est

₂₇operuit faciem eius crassitudo et de lateribus eius arvina dependet

₂₈habitavit in civitatibus desolatis

et in domibus desertis quae in tumulos sunt redactae

₂₉non ditabitur nec perseverabit substantia eius

nec mittet in terra radicem suam

₃₀non recedet de tenebris

ramos eius arefaciet flamma

et auferetur spiritu oris sui

₃₁non credat frustra errore deceptus

quod aliquo pretio redimendus sit

₃₂antequam dies eius impleantur peribit

et manus eius arescet

₃₃laedetur quasi vinea in primo flore botrus eius

et quasi oliva proiciens florem suum

₃₄congregatio enim hypocritae sterilis

et ignis devorabit tabernacula eorum

qui munera libenter accipiunt

₃₅concepit dolorem et peperit iniquitatem

et uterus eius praeparat dolos