HIEREMIAS PROPHETA 41

₁et factum est in mense septimo

venit Ismahel filius Nathaniae filii Elisama de semine regali

et optimates regis et decem viri cum eo

ad Godoliam filium Ahicam in Masphat

et comederunt ibi panes simul in Masphat

₂surrexit autem Ismahel filius Nathaniae

et decem viri qui erant cum eo

et percusserunt Godoliam filium Ahicam filii Saphan gladio

et interfecerunt eum quem praefecerat rex Babylonis terrae

₃omnes quoque Iudaeos qui erant cum Godolia in Masphat

et Chaldeos qui repperti sunt ibi

et viros bellatores percussit Ismahel

₄secundo autem die postquam occiderat Godoliam

nullo adhuc sciente

₅venerunt viri de Sychem et de Silo et de Samaria

octoginta viri rasi barbam et scissis vestibus et squalentes

munera et tus habebant in manu ut offerrent in domo Domini

₆egressus ergo Ismahel filius Nathaniae in occursum eorum de Masphat

incedens et plorans ibat

cum autem occurrisset eis dixit ad eos

venite ad Godoliam filium Ahicam

₇qui cum venissent ad medium civitatis

interfecit eos Ismahel filius Nathaniae circa medium laci

ipse et viri qui erant cum eo

₈decem autem viri repperti sunt inter eos qui dixerunt ad Ismahel

noli occidere nos quia habemus thesauros in agro

frumenti et hordei et olei et mellis

et cessavit et non interfecit eos cum fratribus suis

₉lacus autem in quem proiecerat Ismahel omnia cadavera virorum

quos percussit propter Godoliam

ipse est quem fecit rex Asa propter Baasa regem Israhel

ipsum replevit Ismahel filius Nathaniae occisis

₁₀et captivas duxit Ismahel omnes reliquias populi

qui erant in Masphat

filias regis et universum populum qui remanserat in Masphat

quos commendarat Nabuzardan princeps militiae

Godoliae filio Ahicam

et cepit eos Ismahel filius Nathaniae

et abiit ut transiret ad filios Ammon

₁₁audivit autem Iohanan filius Caree

et omnes principes bellatorum qui erant cum eo

omne malum quod fecerat Ismahel filius Nathaniae

₁₂et adsumptis universis viris profecti sunt

ut bellarent adversum Ismahel filium Nathaniae

et invenerunt eum ad aquas Multas quae sunt in Gabaon

₁₃cumque vidisset omnis populus qui erat cum Ismahel

Iohanan filium Caree et universos principes bellatorum qui erant cum eo

laetati sunt

₁₄et reversus est omnis populus quem ceperat Ismahel in Masphat

reversusque abiit ad Iohanan filium Caree

₁₅Ismahel autem filius Nathaniae fugit cum octo viris a

facie Iohanan

et abiit ad filios Ammon

₁₆tulit ergo Iohanan filius Caree

et omnes principes bellatorum qui erant cum eo

universas reliquias vulgi quas reduxerat ab

Ismahel filio Nathaniae de Masphat

postquam percussit Godoliam filium Ahicam

fortes viros ad proelium

et mulieres et pueros et eunuchos quos reduxerat de Gabaon

₁₇et abierunt et sederunt peregrinantes in Chamaam

quae est iuxta Bethleem

ut pergerent et introirent Aegyptum

₁₈a facie Chaldeorum

timebant enim eos

quia percusserat Ismahel filius Nathaniae Godoliam filium Ahicam

quem praeposuerat rex Babylonis in terra Iuda