HIEREMIAS PROPHETA 36

₁et factum est in anno quarto Ioachim filii Iosiae regis

Iuda

factum est verbum hoc ad Hieremiam a Domino dicens

₂tolle volumen libri

et scribes in eo omnia verba quae locutus sum tibi

adversum Israhel et Iudam et adversum omnes gentes

a die qua locutus sum ad te ex diebus Iosiae usque ad diem hanc

₃si forte audiente domo Iuda universa mala quae ego cogito facere eis

revertatur unusquisque a via sua pessima

et propitius ero iniquitati et peccato eorum

₄vocavit ergo Hieremias Baruch filium Neriae

et scripsit Baruch ex ore Hieremiae

omnes sermones Domini quos locutus est ad eum in volumine libri

₅et praecepit Hieremias Baruch dicens

ego clausus sum nec valeo ingredi domum Domini

₆ingredere ergo tu et lege de volumine

in quo scripsisti ex ore meo verba Domini

audiente populo in domo Domini in die ieiunii

insuper et audiente universo Iuda

qui veniunt de civitatibus suis leges eis

₇si forte cadat oratio eorum in conspectu Domini

et revertatur unusquisque a via sua pessima

quoniam magnus furor et indignatio

quam locutus est Dominus adversum populum hunc

₈et fecit Baruch filius Neriae

iuxta omnia quae praeceperat ei Hieremias propheta

legens ex volumine sermones Domini in domo Domini

₉factum est autem in anno quinto Ioachim filii Iosiae

regis Iuda in mense nono

praedicaverunt ieiunium in conspectu Domini

omni populo in Hierusalem et universae multitudini

quae confluxerat de civitatibus Iuda in Hierusalem

₁₀legitque Baruch ex volumine sermones Hieremiae in domo Domini

in gazofilacio Gamariae filii Saphan scribae

in vestibulo superiori in introitu portae novae domus Domini

audiente omni populo

₁₁cumque audisset Micheas filius Gamariae filii Saphan

omnes sermones Domini ex libro

₁₂descendit in domum regis ad gazofilacium scribae

et ecce ibi omnes principes sedebant

Elisama scriba et Dalaias filius Semeiae

et Elnathan filius Achobor et Gamarias filius Saphan

et Sedecias filius Ananiae et universi principes

₁₃et nuntiavit eis Micheas omnia verba

quae audivit legente Baruch ex volumine in auribus populi

₁₄miserunt itaque omnes principes ad Baruch

Iudi filium Nathaniae filii Selemiae filii Chusi dicentes

volumen ex quo legisti audiente populo sume in manu tua et veni

tulit ergo Baruch filius Neriae volumen in manu sua et venit ad eos

₁₅et dixerunt ad eum sede et lege haec in auribus nostris

et legit Baruch in auribus eorum

₁₆igitur cum audissent omnia verba

obstipuerunt unusquisque ad proximum suum

et dixerunt ad Baruch

nuntiare debemus regi omnes sermones istos

₁₇et interrogaverunt eum dicentes

indica nobis quomodo scripsisti omnes sermones istos ex ore eius

₁₈dixit autem eis Baruch

ex ore suo loquebatur quasi legens ad me omnes sermones istos

et ego scribebam in volumine atramento

₁₉et dixerunt principes ad Baruch

vade et abscondere tu et Hieremias et nemo sciat ubi sitis

₂₀et ingressi sunt ad regem in atrium

porro volumen commendaverunt in gazofilacio Elisamae scribae

et nuntiaverunt audiente rege omnes sermones

₂₁misitque rex Iudi ut sumeret volumen

qui tollens illud de gazofilacio Elisamae scribae

legit audiente rege et universis principibus qui stabant circa regem

₂₂rex autem sedebat in domo hiemali in mense nono

et posita erat arula coram eo plena prunis

₂₃cumque legisset Iudi tres pagellas vel quattuor

scidit illud scalpello scribae

et proiecit in igne qui erat super arulam

donec consumeretur omne volumen igni qui erat in arula

₂₄et non timuerunt neque sciderunt vestimenta sua

rex et omnes servi eius qui audierunt universos sermones istos

₂₅verumtamen Elnathan et Dalaias et Gamarias

contradixerunt regi ne conbureret librum et non audivit eos

₂₆et praecepit rex Hieremahel filio Ammelech

et Saraiae filio Ezrihel et Selemiae filio Abdehel

ut conprehenderent Baruch scribam et Hieremiam prophetam

abscondit autem eos Dominus

₂₇et factum est verbum Domini ad Hieremiam

postquam conbuserat rex volumen

et sermones quos scripserat Baruch ex ore Hieremiae dicens

₂₈rursum tolle volumen aliud

et scribe in eo omnes sermones priores

qui erant in volumine primo

quod conbusit Ioachim rex Iuda

₂₉et ad Ioachim regem Iuda dices haec dicit Dominus

tu conbusisti volumen illud dicens

quare scripsisti in eo adnuntians

festinus veniet rex Babylonis et vastabit terram hanc

et cessare faciet ex illa hominem et iumentum

₃₀propterea haec dicit Dominus contra Ioachim regem Iuda

non erit ex eo qui sedeat super solium David

et cadaver eius proicietur ad aestum per diem et ad gelu per noctem

₃₁et visitabo contra eum et contra semen eius

et contra servos eius iniquitates suas

et adducam super eos et super habitatores Hierusalem

et super viros Iuda

omne malum quod locutus sum ad eos et non audierunt

₃₂Hieremias autem tulit volumen aliud

et dedit illud Baruch filio Neriae scribae

qui scripsit in eo ex ore Hieremiae

omnes sermones libri quem conbuserat Ioachim rex Iuda

igni

et insuper additi sunt sermones multo plures

quam ante fuerant