HIEREMIAS PROPHETA 32

₁verbum quod factum est ad Hieremiam a Domino

in anno decimo Sedeciae regis Iuda

ipse est annus octavusdecimus

Nabuchodonosor

₂tunc exercitus regis Babylonis obsidebat Hierusalem

et Hieremias propheta erat clausus in atrio carceris

qui erat in domo regis Iuda

₃clauserat enim eum Sedecias rex Iuda dicens

quare vaticinaris dicens haec dicit Dominus

ecce ego dabo civitatem istam in manu regis Babylonis

et capiet eam

₄et Sedecias rex Iuda non effugiet de manu Chaldeorum

sed tradetur in manu regis Babylonis

et loquetur os eius cum ore illius

et oculi eius oculos illius videbunt

₅et in Babylonem ducet Sedeciam

et ibi erit donec visitem eum ait Dominus

si autem dimicaveritis adversum Chaldeos

nihil prosperum habebitis

₆et dixit Hieremias

factum est verbum Domini ad me dicens

₇ecce Anamehel filius Sellum patruelis tuus veniet ad te dicens

eme tibi agrum meum qui est in Anathoth

tibi enim conpetit ex propinquitate ut emas

₈et venit ad me Anamehel filius patrui mei

secundum verbum Domini ad vestibulum carceris

et ait ad me

posside agrum meum qui est in Anathoth in terra Beniamin

quia tibi conpetit hereditas

et tu propinquus ut possideas

intellexi autem quod verbum Domini esset

₉et emi agrum ab Anamehel filio patrui mei qui est in Anathoth

et adpendi ei argentum septem stateres et decem argenteos

₁₀et scripsi in libro et signavi et adhibui testes

et adpendi argentum in statera

₁₁et accepi librum possessionis signatum

stipulationes et rata et signa forinsecus

₁₂et dedi librum possessionis Baruch filio Neri filii Maasiae

in oculis Anamehel patruelis mei

et in oculis testium qui scripti erant in libro emptionis

in oculis omnium Iudaeorum qui sedebant in atrio carceris

₁₃et praecepi Baruch coram eis dicens

₁₄haec dicit Dominus exercituum Deus Israhel sume libros istos

librum emptionis hunc signatum et librum hunc qui apertus est

et pones illos in vase fictili

ut permanere possint diebus multis

₁₅haec enim dicit Dominus exercituum Deus Israhel

adhuc possidebuntur domus et agri et vineae in terra ista

₁₆et oravi ad Dominum

postquam tradidi librum possessionis Baruch filio Neri

dicens

₁₇heu heu heu Domine Deus

ecce tu fecisti caelum et terram in fortitudine tua magna

et in brachio tuo extento

non erit tibi difficile omne verbum

₁₈qui facis misericordiam in milibus

et reddes iniquitatem patrum in sinu

filiorum eorum post eos

fortissime magne potens Dominus exercituum nomen tibi

₁₉magnus consilio et inconprehensibilis cogitatu

cuius oculi aperti sunt super omnes vias filiorum Adam

ut reddas unicuique secundum vias suas

et secundum fructum adinventionum eius

₂₀qui posuisti signa et portenta in terra Aegypti

usque ad diem hanc et in Israhel et in hominibus

et fecisti tibi nomen sicut est dies haec

₂₁et eduxisti populum tuum Israhel de terra Aegypti

in signis et in portentis

et in manu robusta et in brachio extento et in terrore magno

₂₂et dedisti eis terram hanc quam iurasti patribus eorum ut dares eis

terram fluentem lacte et melle

₂₃et ingressi sunt et possederunt eam

et non oboedierunt voci tuae

et in lege tua non ambulaverunt

omnia quae mandasti eis ut facerent non fecerunt

et evenerunt eis omnia mala haec

₂₄ecce munitiones extructae sunt adversum civitatem ut capiatur

et urbs data est in manu Chaldeorum

qui proeliantur adversum eam

a facie gladii et famis et pestilentiae

et quaecumque locutus es acciderunt ut ipse tu cernis

₂₅et tu dicis mihi Domine Deus

eme agrum argento et adhibe testes

cum urbs data sit in manu Chaldeorum

₂₆et factum est verbum Domini ad Hieremiam dicens

₂₇ecce ego Dominus Deus universae carnis

numquid mihi difficile erit omne verbum

₂₈propterea haec dicit Dominus

ecce ego tradam civitatem istam in manu Chaldeorum

et in manu regis Babylonis

et capiet eam

₂₉et venient Chaldei proeliantes adversum urbem hanc

et succendent eam igni et conburent eam

et domos in quarum domatibus sacrificabant Baal

et libabant diis alienis libamina ad inritandum me

₃₀erant enim filii Israhel et filii Iuda iugiter facientes malum

in oculis meis ab adulescentia sua

filii Israhel qui usque nunc exacerbant me

in opere manuum suarum dicit Dominus

₃₁quia in furore et in indignatione mea facta est mihi civitas haec

a die qua aedificaverunt eam usque ad diem istam

qua aufertur de conspectu meo

₃₂propter malitiam filiorum Israhel et filiorum Iuda

quam fecerunt ad iracundiam me provocantes

ipsi et reges eorum

principes eorum et sacerdotes et prophetae eorum

vir Iuda et habitatores Hierusalem

₃₃et verterunt ad me terga et non facies

cum docerem eos diluculo et erudirem

et nollent audire ut acciperent disciplinam

₃₄et posuerunt idola sua in domo

in qua invocatum est nomen meum

ut polluerent eam

₃₅et aedificaverunt excelsa Baal quae sunt in valle filii Ennom

ut initiarent filios suos et filias suas Moloch

quod non mandavi eis nec ascendit in cor meum

ut facerent abominationem hanc et in peccatum deducerent Iudam

₃₆et nunc propter ista haec dicit Dominus Deus Israhel

ad civitatem hanc de qua vos dicitis

quod tradatur in manu regis Babylonis

in gladio et in fame et in peste

₃₇ecce ego congregabo eos de universis terris ad quas eieci eos

in furore meo et in ira mea et in indignatione grandi

et reducam eos ad locum istum et habitare eos faciam confidenter

₃₈et erunt mihi in populum et ego ero eis in Deum

₃₉et dabo eis cor unum et viam unam ut timeant me universis diebus

et bene sit eis et filiis eorum post eos

₄₀et feriam eis pactum sempiternum et non desinam eis benefacere

et timorem meum dabo in corde eorum

ut non recedant a me

₄₁et laetabor super eis cum bene eis fecero

et plantabo eos in terra ista in veritate

in toto corde meo et in tota anima mea

₄₂quia haec dicit Dominus

sicut adduxi super populum istum omne malum hoc grande

sic adducam super eos omne bonum quod ego loquor ad eos

₄₃et possidebuntur agri in terra ista

de qua vos dicitis quod deserta sit

eo quod non remanserit homo et iumentum

et data sit in manu Chaldeorum

₄₄agri pecunia ementur et scribentur in libro

et inprimetur signum et testis adhibebitur

in terra Beniamin et in circuitu Hierusalem

in civitatibus Iuda et in civitatibus montanis

et in civitatibus campestribus et in civitatibus quae ad austrum sunt

quia convertam captivitatem eorum ait Dominus