HIEREMIAS PROPHETA 33

₁et factum est verbum Domini ad Hieremiam secundo

cum adhuc clausus esset in atrio carceris dicens

₂haec dicit Dominus

qui facturus est Dominus et formaturus

illud et paraturus

Dominus nomen eius

₃clama ad me et exaudiam te

et adnuntiabo tibi grandia et firma quae nescis

₄quia haec dicit Dominus Deus Israhel

ad domos urbis huius et ad domos regis Iuda quae destructae sunt

et ad munitiones et gladium

₅venientium ut dimicent cum Chaldeis

et impleant eas cadaveribus hominum

quas percussi in furore meo et in indignatione mea

abscondens faciem meam a civitate hac

propter omnem malitiam eorum

₆ecce ego obducam ei cicatricem et sanitatem et curabo eos

et revelabo illis deprecationem pacis et veritatis

₇et convertam conversionem Iuda et conversionem Hierusalem

et aedificabo eos sicut a principio

₈et emundabo illos ab omni iniquitate sua in qua peccaverunt mihi

et propitius ero cunctis iniquitatibus eorum

in quibus deliquerunt mihi et spreverunt me

₉et erit mihi in nomen et in gaudium et in laudem

et in exultationem cunctis gentibus terrae

quae audierint omnia bona quae ego facturus sum eis

et pavebunt et turbabuntur in universis bonis

et in omni pace quam ego faciam ei

₁₀haec dicit Dominus

adhuc audietur in loco isto quem vos dicitis esse desertum

eo quod non sit homo et iumentum in civitatibus Iuda et

foris Hierusalem

quae desolatae sunt absque homine

et absque habitatore et absque pecore

₁₁vox gaudii et vox laetitiae vox sponsi et vox sponsae

vox dicentium confitemini Domino exercituum

quoniam bonus Dominus quoniam in aeternum misericordia eius

et portantium vota in domum Domini

reducam enim conversionem terrae sicut a principio dicit Dominus

₁₂haec dicit Dominus exercituum

adhuc erit in loco isto deserto absque homine et absque iumento

et in cunctis civitatibus eius

habitaculum pastorum accubantium gregum

₁₃in civitatibus montuosis et in civitatibus campestribus

et in civitatibus quae ad austrum sunt

et in terra Beniamin et in circuitu Hierusalem et in civitatibus Iuda

adhuc transibunt greges ad manum numerantis ait Dominus

₁₄ecce dies veniunt dicit Dominus

et suscitabo verbum bonum

quod locutus sum ad domum Israhel et ad domum Iuda

₁₅in diebus illis et in tempore illo

germinare faciam David germen iustitiae

et faciet iudicium et iustitiam in terra

₁₆in diebus illis salvabitur Iuda et Hierusalem habitabit

confidenter

et hoc est quod vocabit eam

Dominus iustus noster

₁₇quia haec dicit Dominus

non interibit de David vir qui sedeat super thronum domus Israhel

₁₈et de sacerdotibus et Levitis non interibit vir a facie mea

qui offerat holocaustomata et incendat sacrificium

et caedat victimas cunctis diebus

₁₉et factum est verbum Domini ad Hieremiam dicens

₂₀haec dicit Dominus

si irritum fieri potest pactum meum cum die

et pactum meum cum nocte

ut non sit dies et nox in tempore suo

₂₁et pactum meum irritum esse poterit cum David servo meo

ut non sit ex eo filius qui regnet in throno eius

et Levitae et sacerdotes ministri mei

₂₂sicuti numerari non possunt stellae caeli

et metiri harena maris

sic multiplicabo semen David servi mei et Levitas ministros meos

₂₃et factum est verbum Domini ad Hieremiam dicens

₂₄numquid non vidisti quid populus hic locutus sit dicens

duae cognationes quas elegerat Dominus abiectae sunt

et populum meum despexerunt eo quod non sit ultra gens coram eis

₂₅haec dicit Dominus

si pactum meum inter diem et noctem

et leges caelo et terrae non posui

₂₆equidem et semen Iacob et David servi mei proiciam

ut non adsumam de semine eius

principes seminis Abraham et Isaac et Iacob

reducam enim conversionem eorum et miserebor eis