HIEREMIAS PROPHETA 13

₁haec dicit Dominus ad me vade et posside tibi lumbare lineum

et pones illud super lumbos tuos et in aquam non inferes illud

₂et possedi lumbare iuxta verbum Domini

et posui circa lumbos meos

₃et factus est sermo Domini ad me secundo dicens

₄tolle lumbare quod possedisti quod est circa lumbos tuos

et surgens vade ad Eufraten

et absconde illud ibi in foramine petrae

₅et abii et abscondi illud in Eufraten

sicut praeceperat mihi Dominus

₆et factum est post dies plurimos dixit Dominus ad me

surge vade ad Eufraten et tolle inde lumbare

quod praecepi tibi ut absconderes illud ibi

₇et abii ad Eufraten

et fodi et tuli lumbare de loco ubi absconderam illud

et ecce conputruerat lumbare ita ut nullo usui aptum esset

₈et factum est verbum Domini ad me dicens

₉haec dicit Dominus

sic putrescere faciam superbiam Iuda et superbiam Hierusalem multam

₁₀populum istum pessimum qui nolunt audire verba mea

et ambulant in pravitate cordis sui

abieruntque post deos alienos ut servirent eis et adorarent eos

et erunt sicut lumbare istud quod nullo usui aptum est

₁₁sicut enim adheret lumbare ad lumbos viri

sic adglutinavi mihi omnem domum Israhel

et omnem domum Iuda dicit Dominus

ut esset mihi in populum et in nomen

et in laudem et in gloriam et non audierunt

₁₂dices ergo ad eos sermonem istum

haec dicit Dominus Deus Israhel

omnis laguncula implebitur vino

et dicent ad te numquid ignoramus

quia omnis laguncula implebitur vino

₁₃et dices ad eos haec dicit Dominus

ecce ego implebo omnes habitatores terrae huius

et reges qui sedent de stirpe David super thronum eius

et sacerdotes et prophetas

et omnes habitatores Hierusalem ebrietate

₁₄et dispergam eos virum a fratre suo

et patres et filios pariter ait Dominus

non parcam et non concedam neque miserebor ut non disperdam eos

₁₅audite et auribus percipite

nolite elevari quia Dominus locutus est

₁₆date Domino Deo vestro gloriam

antequam contenebrescat

et antequam offendant pedes vestri ad montes caligosos

expectabitis lucem

et ponet eam in umbram mortis et in caliginem

₁₇quod si hoc non audieritis

in abscondito plorabit anima mea a facie superbiae

plorans plorabit et deducet oculus meus lacrimam

quia captus est grex Domini

₁₈dic regi et dominatrici humiliamini sedete

quoniam descendit de capite vestro corona gloriae vestrae

₁₉civitates austri clausae sunt et non est qui aperiat

translata est omnis Iudaea transmigratione perfecta

₂₀levate oculos vestros et videte qui venitis ab aquilone

ubi est grex qui datus est tibi pecus inclitum tuum

₂₁quid dices cum visitaverit te

tu enim docuisti eos adversum te et erudisti in caput tuum

numquid non dolores adprehendent te quasi mulierem

parturientem

₂₂quod si dixeris in corde tuo

quare venerunt mihi haec

propter multitudinem iniquitatis tuae revelata sunt verecundiora tua

pollutae sunt plantae tuae

₂₃si mutare potest Aethiops pellem suam aut pardus varietates suas

et vos poteritis bene facere cum didiceritis malum

₂₄et disseminabo eos quasi stipulam quae vento raptatur in deserto

₂₅haec sors tua parsque mensurae tuae a me

dicit Dominus

quia oblita es mei et confisa es in mendacio

₂₆unde et ego nudavi femora tua contra faciem tuam

et apparuit ignominia tua

₂₇adulteria tua et hinnitus tuus scelus fornicationis tuae

super colles in agro vidi abominationes tuas

vae tibi Hierusalem non mundaberis post me usquequo adhuc