LIBER IUDITH 2

₁anno tertiodecimo Nabuchodonosor regis

vicesima et secunda die mensis primi

factum est verbum in domo Nabuchodonosor regis Assyriorum

ut defenderet se

₂vocavitque omnes maiores

omnesque duces bellatores suos

et habuit cum eis mysterium consilii sui

₃dixitque cogitationem suam in eo esse

ut omnem terram suo subiugaret imperio

₄quod dictum cum placuisset omnibus

vocavit Nabuchodonosor rex Holofernem principem militiae suae

₅et dixit egredere adversum omne regnum

occidentis

et contra eos praecipue qui contempserunt imperium meum

₆non parcet oculus meus ulli regno

omnemque urbem munitam subiugabis mihi

₇tunc Holofernis vocavit duces et magistratus virtutis Assyriorum

et dinumeravit viros in expeditione sicut praecepit ei rex

centum viginti milia peditum pugnatorum

et equites sagittarios duodecim milia

₈omnemque expeditionem suam fecit praeire multitudinem

innumerabilium camelorum

cum his quae exercitibus sufficerent copiose

boum quoque armenta gregesque ovium

quorum non erat numerus

₉frumentum ex omni Syria in transitu suo parari constituit

₁₀aurum vero et argentum de domo regis adsumpsit multum nimis

₁₁et profectus est ipse et omnis exercitus

cum quadrigis et equitibus et sagittariis

qui cooperuerunt faciem terrae sicut lucustae

₁₂cumque pertransisset fines Assyriorum

venit ad magnos montes Angae qui sunt a sinistro Ciliciae

ascenditque omnia castella eorum et obtinuit omnem munitionem

₁₃effregit autem civitatem opinatissimam Meluthi

praedavitque omnes filios Tharsis et filios Ismahel

qui erant contra faciem deserti

et ad austrum terrae Celeon

₁₄et transiit Eufraten et venit ad Mesopotamiam

et fregit omnes civitates excelsas quae erant ibi

a torrente Mambre usquequo perveniatur ad mare

₁₅et occupavit terminos eius

a Cilicia usque ad fines Iafeth qui sunt ad austrum

₁₆abduxitque omnes filios Madian

ac praedavit omnem locupletationem eorum

omnesque resistentes sibi occidit in ore gladii

₁₇et post haec descendit in campos Damasci in diebus messis

et succendit omnia sata

omnesque arbores ac vineas fecit incidi

₁₈et cecidit timor illius super omnes inhabitantes terram