ISAIAS PROPHETA 48

₁audite hoc domus Iacob

qui vocamini nomine Israhel et de aquis Iuda existis

qui iuratis in nomine Domini

et Dei Israhel recordamini non in veritate neque in iustitia

₂de civitate enim sancta vocati sunt

et super Deum Israhel constabiliti sunt

Dominus exercituum nomen eius

₃priora ex tunc adnuntiavi et ex ore meo exierunt et audita feci ea

repente operatus sum et venerunt

₄scivi enim quia durus es tu

et nervus ferreus cervix tua et frons tua aerea

₅praedixi tibi ex tunc antequam venirent indicavi tibi

ne forte diceres idola mea fecerunt haec

et sculptilia mea et conflatilia mandaverunt ista

₆quae audisti vide omnia

vos autem non adnuntiastis

audita feci tibi nova ex nunc et conservata quae nescis

₇nunc creata sunt et non ex tunc et ante diem et non audisti ea

ne forte dicas ecce cognovi ea

₈neque audisti neque cognovisti neque ex tunc aperta est auris tua

scio enim quia praevaricans praevaricabis

et transgressorem ex ventre vocavi te

₉propter nomen meum longe faciam furorem meum

et laude mea infrenabo te ne intereas

₁₀ecce excoxi te sed non quasi argentum

elegi te in camino paupertatis

₁₁propter me propter me faciam ut non blasphemer

et gloriam meam alteri non dabo

₁₂audi me Iacob et Israhel quem ego voco

ego ipse ego primus et ego novissimus

₁₃manus quoque mea fundavit terram et dextera mea mensa est caelos

ego vocabo eos et stabunt simul

₁₄congregamini omnes vos et audite quis de eis adnuntiavit haec

Dominus dilexit eum

faciet voluntatem suam in Babylone et brachium suum in Chaldeis

₁₅ego ego locutus sum et vocavi eum

adduxi eum et directa est via eius

₁₆accedite ad me et audite hoc

non a principio in abscondito locutus sum

ex tempore antequam fieret ibi eram

et nunc Dominus Deus misit me et spiritus eius

₁₇haec dicit Dominus redemptor tuus Sanctus Israhel

ego Dominus Deus tuus docens te utilia

gubernans te in via qua ambulas

₁₈utinam adtendisses mandata mea

facta fuisset sicut flumen pax tua

et iustitia tua sicut gurgites maris

₁₉et fuisset quasi harena semen tuum et stirps uteri tui ut lapilli eius

non interisset et non fuisset adtritum nomen eius a facie mea

₂₀egredimini de Babylone fugite a Chaldeis

in voce exultationis adnuntiate auditum facite hoc

efferte illud usque ad extrema

terrae

dicite redemit Dominus servum suum Iacob

₂₁non sitierunt in deserto cum educeret eos

aquam de petra produxit eis

et scidit petram et fluxerunt aquae

₂₂non est pax dicit Dominus impiis