ISAIAS PROPHETA 13

₁onus Babylonis quod vidit Isaias filius Amos

₂super montem caligosum levate signum

exaltate vocem levate manum et ingrediantur portas duces

₃ego mandavi sanctificatis meis

et vocavi fortes meos in ira mea exultantes in gloria mea

₄vox multitudinis in montibus quasi populorum frequentium

vox sonitus regum gentium congregatarum

Dominus exercituum praecepit militiae belli

₅venientibus de terra procul a summitate caeli

Dominus et vasa furoris eius ut disperdat omnem terram

₆ululate quia prope est dies Domini quasi vastitas a Domino veniet

₇propter hoc omnes manus dissolventur

et omne cor hominis tabescet

₈et conteretur

tortiones et dolores tenebunt quasi parturiens dolebunt

unusquisque ad proximum suum stupebit

facies conbustae vultus eorum

₉ecce dies Domini venit crudelis

et indignationis plenus et irae furorisque

ad ponendam terram in solitudine

et peccatores eius conterendos de ea

₁₀quoniam stellae caeli et splendor earum non expandent lumen suum

obtenebratus est sol in ortu suo

et luna non splendebit in lumine suo

₁₁et visitabo super orbis mala

et contra impios iniquitatem eorum

et quiescere faciam superbiam infidelium

et arrogantiam fortium humiliabo

₁₂pretiosior erit vir auro et homo mundo obrizo

₁₃super hoc caelum turbabo et movebitur terra de loco suo

propter indignationem Domini exercituum

et propter diem irae furoris eius

₁₄et erit quasi dammula fugiens et quasi ovis

et non erit qui congreget

unusquisque ad populum suum convertetur

et singuli ad terram suam fugient

₁₅omnis qui inventus fuerit occidetur

et omnis qui supervenerit cadet in gladio

₁₆infantes eorum adlident in oculis eorum

diripientur domus eorum et uxores eorum violabuntur

₁₇ecce ego suscitabo super eos Medos

qui argentum non quaerant nec aurum velint

₁₈sed sagittis parvulos interficiant

et lactantibus uteri non misereantur

et super filios non parcat oculus eorum

₁₉et erit Babylon illa gloriosa in regnis

inclita in superbia Chaldeorum

sicut subvertit Deus Sodomam et Gomorram

₂₀non habitabitur usque in finem

et non fundabitur usque ad generationem et generationem

nec ponet ibi tentoria Arabs nec pastores requiescent ibi

₂₁sed requiescent ibi bestiae

et replebuntur domus eorum draconibus

et habitabunt ibi strutiones et pilosi saltabunt ibi

₂₂et respondebunt ibi ululae in aedibus eius

et sirenae in delubris voluptatis