ISAIAS PROPHETA 12

₁et dices in illa die

confitebor tibi Domine quoniam iratus es mihi

conversus est furor tuus et consolatus es me

₂ecce Deus salvator meus fiducialiter agam et non timebo

quia fortitudo mea et laus mea Dominus Deus

et factus est mihi in salutem

₃haurietis aquas in gaudio de fontibus salvatoris

₄et dicetis in illa die

confitemini Domino et invocate nomen eius

notas facite in populis adinventiones eius

mementote quoniam excelsum est nomen eius

₅cantate Domino quoniam magnifice fecit

adnuntiate hoc in universa terra

₆exulta et lauda habitatio Sion

quia magnus in medio tui Sanctus Israhel