HIEZECHIEL PROPHETA 3

₁et dixit ad me fili hominis quodcumque inveneris comede

comede volumen istud et vadens loquere ad filios Israhel

₂et aperui os meum et cibavit me volumine illo

₃et dixit ad me

fili hominis venter tuus comedet et viscera tua conplebuntur

volumine isto quod ego do tibi

et comedi illud et factum est in ore meo sicut mel dulce

₄et dixit ad me fili hominis vade ad domum Israhel

et loqueris verba mea ad eos

₅non enim ad populum profundi sermonis et ignotae linguae

tu mitteris ad domum Israhel

₆neque ad populos multos profundi sermonis et ignotae linguae

quorum non possis audire sermones

et si ad illos mittereris ipsi audirent te

₇domus autem Israhel nolent audire te

quia nolunt audire me

omnis quippe domus Israhel adtrita fronte est et duro corde

₈ecce dedi faciem tuam valentiorem faciebus eorum

et frontem tuam duriorem frontibus eorum

₉ut adamantem et ut silicem dedi faciem tuam

ne timeas eos neque metuas a facie eorum

quia domus exasperans est

₁₀et dixit ad me

fili hominis omnes sermones meos quos loquor ad te

adsume in corde tuo et auribus tuis audi

₁₁et vade ingredere ad transmigrationem ad filios populi tui

et loqueris ad eos et dices eis

haec dicit Dominus Deus si forte audiant et quiescant

₁₂et adsumpsit me spiritus

et audivi post me vocem commotionis magnae

benedicta gloria Domini de loco suo

₁₃et vocem alarum animalium percutientium altera ad alteram

et vocem rotarum sequentium animalia

et vocem commotionis magnae

₁₄spiritus quoque levavit me et adsumpsit me

et abii amarus in indignatione spiritus mei

manus enim Domini erat mecum confortans me

₁₅et veni ad transmigrationem acervum novarum frugum

ad eos qui habitabant iuxta flumen Chobar

et sedi ubi illi sedebant

et mansi ibi septem diebus maerens in medio eorum

₁₆cum autem pertransissent septem dies

factum est verbum Domini ad me dicens

₁₇fili hominis speculatorem dedi te domui Israhel

et audies de ore meo verbum et adnuntiabis eis ex me

₁₈si dicente me ad impium morte morieris

non adnuntiaveris ei neque locutus fueris

ut avertatur a via sua impia et vivat

ipse impius in iniquitate sua morietur

sanguinem autem eius de manu tua requiram

₁₉si autem tu adnuntiaveris impio

et ille non fuerit conversus ab impietate sua et via sua

impia

ipse quidem in iniquitate sua morietur

tu autem animam tuam liberasti

₂₀sed et si conversus iustus a iustitia sua fecerit

iniquitatem

ponam offendiculum coram eo

ipse morietur quia non adnuntiasti ei

in peccato suo morietur

et non erunt in memoria iustitiae eius quas fecit

sanguinem vero eius de manu tua requiram

₂₁si autem tu adnuntiaveris iusto ut non peccet iustus

et ille non peccaverit

vivens vivet quia adnuntiasti ei et tu animam tuam liberasti

₂₂et facta est super me manus Domini et dixit ad me

surgens egredere in campum et ibi loquar tecum

₂₃et surgens egressus sum in campum

et ecce ibi gloria Domini stabat

quasi gloria quam vidi iuxta fluvium Chobar

et cecidi in faciem meam

₂₄et ingressus est in me spiritus et statuit me super pedes meos

et locutus est mihi et dixit ad me

ingredere et includere in medio domus tuae

₂₅et tu fili hominis ecce data sunt super te vincula

et ligabunt te in eis et non egredieris in medio eorum

₂₆et linguam tuam adherescere faciam palato tuo

et eris mutus nec quasi vir obiurgans

quia domus exasperans est

₂₇cum autem locutus fuero tibi aperiam os tuum et dices ad eos

haec dicit Dominus Deus

qui audit audiat et qui quiescit quiescat

quia domus exasperans est