HIEZECHIEL PROPHETA 26

₁et factum est in undecimo anno prima mensis

factus est sermo Domini ad me dicens

₂fili hominis pro eo quod dixit Tyrus de Hierusalem euge

confractae sunt portae populorum

conversa est ad me implebor deserta est

₃propterea haec dicit Dominus Deus

ecce ego super te Tyre et ascendere faciam ad te gentes multas

sicut ascendit mare fluctuans

₄et dissipabunt muros Tyri et destruent turres eius

et radam pulverem eius de ea

et dabo eam in limpidissimam petram

₅siccatio sagenarum erit in medio maris

quia ego locutus sum ait Dominus Deus

et erit in direptionem gentibus

₆filiae quoque eius quae sunt in agro gladio interficientur

et scient quia ego Dominus

₇quia haec dicit Dominus Deus

ecce ego adducam ad Tyrum Nabuchodonosor regem Babylonis ab aquilone

regem regum cum equis et curribus et equitibus

et coetu populoque magno

₈filias tuas quae sunt in agro gladio interficiet

et circumdabit te munitionibus

et conportabit aggerem in gyro

et levabit contra te clypeum

₉et vineas et arietes temperabit in muros tuos

et turres tuas destruet in armatura sua

₁₀inundatione equorum eius operiet te pulvis eorum

a sonitu equitum et rotarum et curruum movebuntur muri tui

dum ingressus fuerit portas tuas

quasi per introitus urbis dissipatae

₁₁ungulis equorum suorum conculcabit omnes plateas tuas

populum tuum gladio caedet

et statuae tuae nobiles in terram corruent

₁₂vastabunt opes tuas diripient negotiationes tuas

et destruent muros tuos et domos tuas praeclaras subvertent

et lapides tuos et ligna tua et pulverem tuum in medio aquarum ponent

₁₃et quiescere faciam multitudinem canticorum tuorum

et sonitus cithararum tuarum non audietur amplius

₁₄et dabo te in limpidissimam petram siccatio sagenarum eris

nec aedificaberis ultra

quia ego locutus sum dicit Dominus Deus

₁₅haec dicit Dominus Deus Tyro

numquid non a sonitu ruinae tuae et gemitu interfectorum tuorum

cum occisi fuerint in medio tui commovebuntur insulae

₁₆et descendent de sedibus suis omnes principes maris

et auferent exuvias suas

et vestimenta sua varia abicient et induentur stupore

in terra sedebunt et adtoniti super repentino casu tuo admirabuntur

₁₇et adsumentes super te lamentum dicent tibi

quomodo peristi quae habitas in mari urbs inclita

quae fuisti fortis in mari cum habitatoribus tuis

quos formidabant universi

₁₈nunc stupebunt naves in die pavoris tui

et turbabuntur insulae in mari eo quod nullus egrediatur ex te

₁₉quia haec dicit Dominus Deus

cum dedero te urbem desolatam sicut civitates quae non habitantur

et adduxero super te abyssum et operuerint te aquae multae

₂₀et detraxero te cum his qui descendunt in lacum ad populum sempiternum

et conlocavero te in terra novissima

sicut solitudines veteres cum his qui deducuntur in lacum

ut non habiteris

porro dedero gloriam in terra viventium

₂₁in nihilum redigam te et non eris

et requisita non invenieris ultra in sempiternum

dicit Dominus Deus