LIBER EXODI 36

₁fecit ergo Beselehel et Hooliab et omnis vir sapiens

quibus dedit Dominus sapientiam et intellectum

ut scirent fabre operari quae in usus sanctuarii necessaria sunt

et quae praecepit Dominus

₂cumque vocasset eos Moses

et omnem eruditum virum cui dederat Deus sapientiam

et qui sponte sua obtulerant se ad faciendum

opus

₃tradidit eis universa donaria filiorum Israhel

qui cum instarent operi

cotidie mane vota populus offerebat

₄unde artifices venire conpulsi

₅dixerunt Mosi

plus offert populus quam necessarium est

₆iussit ergo Moses praeconis voce cantari

nec vir nec mulier quicquam ultra offerat in opere sanctuarii

sicque cessatum est a muneribus offerendis

₇eo quod oblata sufficerent et superabundarent

₈feceruntque omnes corde sapientes

ad explendum opus tabernaculi cortinas decem

de bysso retorta et hyacintho et purpura coccoque bis tincto

opere vario et arte polymita

₉quarum una habebat in longitudine viginti octo cubitos

et in latitudine quattuor

una mensura erat omnium cortinarum

₁₀coniunxitque cortinas quinque alteram alteri

et alias quinque sibi invicem copulavit

₁₁fecit et ansas hyacinthinas in ora cortinae unius ex utroque latere

et in ora cortinae alterius similiter

₁₂ut contra se invicem venirent ansae et mutuo iungerentur

₁₃unde et quinquaginta fudit circulos aureos

qui morderent cortinarum ansas et fieret unum tabernaculum

₁₄fecit et saga undecim de pilis caprarum

ad operiendum tectum tabernaculi

₁₅unum sagum habebat in longitudine cubitos triginta

et in latitudine cubitos quattuor

unius mensurae erant omnia saga

₁₆quorum quinque iunxit seorsum

et sex alia separatim

₁₇fecitque ansas quinquaginta in ora sagi unius

et quinquaginta in ora sagi alterius

ut sibi invicem iungerentur

₁₈et fibulas aeneas quinquaginta quibus necteretur tectum

et unum pallium ex omnibus sagis fieret

₁₉fecit et opertorium tabernaculi de pellibus arietum rubricatis

aliudque desuper velamentum de pellibus ianthinis

₂₀fecit et tabulas tabernaculi de lignis setthim stantes

₂₁decem cubitorum erat longitudo tabulae unius

et unum ac semis cubitum latitudo retinebat

₂₂binae incastraturae erant per singulas tabulas

ut altera alteri iungeretur

sic fecit in omnibus tabulis tabernaculi

₂₃e quibus viginti ad plagam meridianam erant contra austrum

₂₄cum quadraginta basibus argenteis

duae bases sub una tabula ponebantur

ex utraque angulorum parte

ubi incastraturae laterum in angulis terminantur

₂₅ad plagam quoque tabernaculi quae respicit ad aquilonem

fecit viginti tabulas

₂₆cum quadraginta argenteis basibus

duas bases per singulas tabulas

₂₇contra occidentem vero

id est ad eam partem tabernaculi quae mare respicit

fecit sex tabulas

₂₈et duas alias per singulos angulos tabernaculi retro

₂₉quae iunctae erant deorsum usque sursum

et in unam conpagem pariter ferebantur

ita fecit ex utraque parte per angulos

₃₀ut octo essent simul tabulae et haberent bases argenteas sedecim

binas scilicet bases sub singulis tabulis

₃₁fecit et vectes de lignis setthim quinque

ad continendas tabulas unius lateris tabernaculi

₃₂et quinque alios ad alterius lateris tabulas coaptandas

et extra hos quinque alios vectes

ad occidentalem plagam tabernaculi contra mare

₃₃fecit quoque vectem alium

qui per medias tabulas ab angulo usque ad angulum perveniret

₃₄ipsa autem tabulata deauravit

et circulos eorum fecit aureos

per quos vectes induci possint

quos et ipsos aureis lamminis operuit

₃₅fecit et velum de hyacintho purpura vermiculo ac

bysso retorta

opere polymitario varium atque distinctum

₃₆et quattuor columnas de lignis setthim

quas cum capitibus deauravit fusis basibus earum argenteis

₃₇fecit et tentorium in introitu tabernaculi

ex hyacintho purpura vermiculo byssoque retorta opere

plumarii

₃₈et columnas quinque cum capitibus suis quas operuit auro

basesque earum fudit aeneas