LIBER EXODI 26

₁tabernaculum vero ita fiet

decem cortinas de bysso retorta et hyacintho ac purpura coccoque

bis tincto

variatas opere plumario facies

₂longitudo cortinae unius habebit viginti octo cubitos

latitudo quattuor cubitorum erit

unius mensurae fient universa tentoria

₃quinque cortinae sibi iungentur mutuo

et aliae quinque nexu simili coherebunt

₄ansulas hyacinthinas in lateribus ac summitatibus facies cortinarum

ut possint invicem copulari

₅quinquagenas ansulas cortina habebit in utraque parte

ita insertas ut ansa contra ansam veniat et altera alteri possit aptari

₆facies et quinquaginta circulos aureos

quibus cortinarum vela iungenda sunt ut unum tabernaculum fiat

₇facies et saga cilicina undecim ad operiendum tectum tabernaculi

₈longitudo sagi unius habebit triginta cubitos et latitudo quattuor

aequa erit mensura sagorum omnium

₉e quibus quinque iunges seorsum et sex sibi mutuo copulabis

ita ut sextum sagum in fronte tecti duplices

₁₀facies et quinquaginta ansas in ora sagi unius

ut coniungi cum altero queat

et quinquaginta ansas in ora sagi alterius

ut cum altero copuletur

₁₁quinquaginta fibulas aeneas quibus iungantur ansae

et unum ex omnibus operimentum fiat

₁₂quod autem superfuerit in sagis quae parantur tecto

id est unum sagum quod amplius est

ex medietate eius operies posteriora tabernaculi

₁₃et cubitus ex una parte pendebit et alter ex altera

qui plus est in sagorum longitudine

utrumque latus tabernaculi protegens

₁₄facies et operimentum aliud tecto de pellibus arietum rubricatis

et super hoc rursum aliud operimentum de ianthinis pellibus

₁₅facies et tabulas stantes tabernaculi de lignis setthim

₁₆quae singulae denos cubitos in longitudine habeant

et in latitudine singulos ac semissem

₁₇in lateribus tabulae duae incastraturae fient

quibus tabula alteri tabulae conectatur

atque in hunc modum cunctae tabulae parabuntur

₁₈quarum viginti erunt in latere meridiano

quod vergit ad austrum

₁₉quibus quadraginta bases argenteas fundes

ut binae bases singulis tabulis per duos angulos subiciantur

₂₀in latere quoque secundo tabernaculi quod vergit ad aquilonem

viginti tabulae erunt

₂₁quadraginta habentes bases argenteas

binae bases singulis tabulis subponentur

₂₂ad occidentalem vero plagam tabernaculi facies sex tabulas

₂₃et rursum alias duas

quae in angulis erigantur post tergum tabernaculi

₂₄eruntque coniunctae a deorsum usque sursum

et una omnes conpago retinebit

duabus quoque tabulis quae in angulis ponendae sunt

similis iunctura servabitur

₂₅et erunt simul tabulae octo bases earum argenteae sedecim

duabus basibus per unam tabulam supputatis

₂₆facies et vectes de lignis setthim quinque

ad continendas tabulas in uno latere tabernaculi

₂₇et quinque alios in altero

et eiusdem numeri ad occidentalem plagam

₂₈qui mittentur per medias tabulas a summo usque ad summum

₂₉ipsasque tabulas deaurabis

et fundes eis anulos aureos

per quos vectes tabulata contineant

quos operies lamminis aureis

₃₀et eriges tabernaculum iuxta exemplum

quod tibi in monte monstratum est

₃₁facies et velum de hyacintho et purpura

coccoque bis tincto et bysso retorta

opere plumario et pulchra varietate contextum

₃₂quod adpendes ante quattuor columnas de lignis setthim

quae ipsae quidem deauratae erunt

et habebunt capita aurea sed bases argenteas

₃₃inseretur autem velum per circulos

intra quod pones arcam testimonii

et quo sanctuarium et sanctuarii sanctuaria

dividentur

₃₄pones et propitiatorium super arcam testimonii in sancta

sanctorum

₃₅mensamque extra velum

et contra mensam candelabrum in latere tabernaculi meridiano

mensa enim stabit in parte aquilonis

₃₆facies et tentorium in introitu tabernaculi

de hyacintho et purpura

coccoque bis tincto et bysso retorta opere plumarii

₃₇et quinque columnas deaurabis lignorum setthim

ante quas ducetur tentorium

quarum erunt capita aurea et bases aeneae