LIBER EXODI 22

₁si quis furatus fuerit bovem aut ovem

et occiderit vel vendiderit

quinque boves pro uno bove restituet

et quattuor oves pro una ove

₂si effringens fur domum sive suffodiens fuerit inventus

et accepto vulnere mortuus fuerit

percussor non erit reus sanguinis

₃quod si orto sole hoc fecerit

homicidium perpetravit et ipse morietur

si non habuerit quod pro furto reddat venundabitur

₄si inventum fuerit apud eum quod furatus est vivens

sive bos sive asinus sive ovis

duplum restituet

₅si laeserit quispiam agrum vel vineam

et dimiserit iumentum suum ut depascatur aliena

quicquid optimum habuerit in agro suo vel in vinea

pro damni aestimatione restituet

₆si egressus ignis invenerit spinas

et conprehenderit acervos frugum sive stantes segetes in agris

reddet damnum qui ignem succenderit

₇si quis commendaverit amico pecuniam aut vas in custodiam

et ab eo qui susceperat furto ablata fuerint

si invenitur fur duplum reddet

₈si latet dominus domus adplicabitur ad deos

et iurabit quod non extenderit manum in rem proximi

sui

₉ad perpetrandam fraudem

tam in bove quam in asino et ove ac vestimento

et quicquid damnum inferre potest

ad deos utriusque causa perveniet

et si illi iudicaverint duplum restituet proximo suo

₁₀si quis commendaverit proximo suo asinum bovem ovem et omne iumentum ad

custodiam

et mortuum fuerit aut debilitatum vel captum ab hostibus

nullusque hoc viderit

₁₁iusiurandum erit in medio

quod non extenderit manum ad rem proximi sui

suscipietque dominus iuramentum

et ille reddere non cogetur

₁₂quod si furto ablatum fuerit restituet damnum domino

₁₃si comestum a bestia

deferet ad eum quod occisum est

et non restituet

₁₄qui a proximo suo quicquam horum mutuo postularit

et debilitatum aut mortuum fuerit domino non praesente

reddere conpelletur

₁₅quod si inpraesentiarum fuit dominus non

restituet

maxime si conductum venerat pro mercede operis sui

₁₆si seduxerit quis virginem necdum desponsatam

et dormierit cum ea

dotabit eam et habebit uxorem

₁₇si pater virginis dare noluerit reddet pecuniam iuxta modum dotis

quam virgines accipere consuerunt

₁₈maleficos non patieris vivere

₁₉qui coierit cum iumento morte moriatur

₂₀qui immolat diis occidetur praeter Domino

soli

₂₁advenam non contristabis neque adfliges eum

advenae enim et ipsi fuistis in terra Aegypti

₂₂viduae et pupillo non nocebitis

₂₃si laeseritis eos vociferabuntur ad me

et ego audiam clamorem eorum

₂₄et indignabitur furor meus percutiamque vos gladio

et erunt uxores vestrae viduae et filii vestri pupilli

₂₅si pecuniam mutuam dederis populo meo pauperi qui habitat tecum

non urgues eum quasi exactor nec usuris opprimes

₂₆si pignus a proximo tuo acceperis vestimentum

ante solis occasum redde ei

₂₇ipsum enim est solum quo operitur indumentum

carnis eius

nec habet aliud in quo dormiat

si clamaverit ad me exaudiam eum quia misericors sum

₂₈diis non detrahes et principi populi tui non maledices

₂₉decimas tuas et primitias non tardabis offerre

primogenitum filiorum tuorum dabis mihi

₃₀de bubus quoque et ovibus similiter facies

septem diebus sit cum matre sua

die octavo reddes illum mihi

₃₁viri sancti eritis mihi

carnem quae a bestiis fuerit praegustata non comedetis

sed proicietis canibus