LIBER EXODI 17

₁igitur profecta omnis multitudo filiorum Israhel de deserto Sin

per mansiones suas iuxta sermonem Domini

castrametata est in Raphidim

ubi non erat aqua ad bibendum populo

₂qui iurgatus contra Mosen ait da nobis aquam ut bibamus

quibus respondit Moses

quid iurgamini contra me cur temptatis Dominum

₃sitivit ergo populus ibi pro aquae penuria

et murmuravit contra Mosen dicens

cur nos exire fecisti de Aegypto

ut occideres et nos et liberos nostros ac iumenta siti

₄clamavit autem Moses ad Dominum dicens quid faciam populo huic

adhuc pauxillum et lapidabunt me

₅ait Dominus ad Mosen antecede populum

et sume tecum de senibus Israhel

et virgam qua percussisti fluvium tolle in manu tua et vade

₆en ego stabo coram te ibi super petram

Horeb

percutiesque petram et exibit ex ea aqua ut bibat populus

fecit Moses ita coram senibus Israhel

₇et vocavit nomen loci illius Temptatio

propter iurgium filiorum Israhel

et quia temptaverunt Dominum dicentes

estne Dominus in nobis an non

₈venit autem Amalech et pugnabat contra Israhel in Raphidim

₉dixitque Moses ad Iosue elige viros et egressus pugna contra Amalech

cras ego stabo in vertice collis

habens virgam Dei in manu mea

₁₀fecit Iosue ut locutus ei erat Moses

et pugnavit contra Amalech

Moses autem et Aaron et Hur ascenderunt super verticem collis

₁₁cumque levaret Moses manus vincebat Israhel

sin autem paululum remisisset superabat Amalech

₁₂manus autem Mosi erant graves

sumentes igitur lapidem posuerunt subter eum in quo sedit

Aaron autem et Hur sustentabant manus eius ex utraque

parte

et factum est ut manus ipsius non lassarentur usque ad occasum solis

₁₃fugavitque Iosue Amalech et populum eius in ore gladii

₁₄dixit autem Dominus ad Mosen

scribe hoc ob monumentum in libro

et trade auribus Iosue

delebo enim memoriam Amalech sub caelo

₁₅aedificavitque Moses altare

et vocavit nomen eius Dominus exaltatio mea dicens

₁₆quia manus solii Domini et bellum Dei erit contra Amalech a generatione in generationem