LIBER HESTER 9

₁igitur duodecimi mensis quem adar vocari ante iam diximus

tertiadecima die quando cunctis Iudaeis interfectio parabatur

et hostes eorum inhiabant sanguini

versa vice Iudaei superiores esse coeperunt

et se de adversariis vindicare

₂congregatique sunt per singulas civitates oppida et loca

ut extenderent manum contra inimicos et persecutores suos

nullusque ausus est resistere

eo quod omnes populos magnitudinis eorum formido penetrarat

₃nam et provinciarum iudices duces et procuratores

omnisque dignitas quae singulis locis et operibus

praeerat

extollebant Iudaeos timore Mardochei

₄quem principem esse palatii et plurimum posse cognoverant

fama quoque nominis eius crescebat cotidie

et per cunctorum ora volitabat

₅itaque percusserunt Iudaei inimicos suos plaga magna

et occiderunt eos

reddentes eis quod sibi paraverant facere

₆in tantum ut etiam in Susis quingentos viros interficerent

et decem extra filios Aman Agagitae hostis

Iudaeorum

quorum ista sunt nomina

₇Pharsandatha et Delphon et Esphata

₈et Phorata et Adalia et Aridatha

₉et Ephermesta et Arisai et Aridai et Vaizatha

₁₀quos cum occidissent

praedas de substantiis eorum agere noluerunt

₁₁statimque numerus eorum qui occisi erant in Susis

ad regem relatus est

₁₂qui dixit reginae

in urbe Susis interfecere Iudaei

quingentos viros

et alios decem filios Aman

quantam putas eos exercere caedem in

universis provinciis

quid ultra postulas et quid vis ut fieri iubeam

₁₃cui illa respondit

si regi placet detur potestas Iudaeis

ut sicut hodie fecerunt in Susis sic et cras

faciant

et decem filii Aman in patibulis suspendantur

₁₄praecepitque rex ut ita fieret

statimque in Susis pependit edictum

et decem Aman filii suspensi sunt

₁₅congregatis Iudaeis quartadecima adar mensis die

interfecti sunt in Susis trecenti viri

nec eorum ab illis direpta substantia est

₁₆sed et per omnes provincias quae dicioni regis subiacebant

pro animabus suis stetere Iudaei

interfectis hostibus ac persecutoribus suis

in tantum ut septuaginta quinque milia occisorum implerentur

et nullus de substantiis eorum quicquam contingeret

₁₇dies autem tertiusdecimus mensis adar

unus apud omnes interfectionis fuit

et quartodecimo die caedere desierunt

quem constituerunt esse sollemnem

ut in eo omni deinceps tempore

vacarent epulis gaudio atque conviviis

₁₈at hii qui in urbe Susis caedem exercuerant

tertiodecimo et quartodecimo eiusdem mensis die

in caede versati sunt

quintodecimo autem die percutere desierunt

et idcirco eandem diem constituere

sollemnem epularum atque laetitiae

₁₉hii vero Iudaei qui in oppidis non muratis ac villis morabantur

quartumdecimum diem mensis adar conviviorum et gaudii decreverunt

ita ut exultent in eo

et mittant sibi mutuo partes epularum et ciborum

₂₀scripsit itaque Mardocheus omnia haec

et litteris conprehensa misit ad Iudaeos

qui in omnibus regis provinciis morabantur

tam in vicino positis quam procul

₂₁ut quartamdecimam et quintamdecimam diem mensis adar

pro festis susciperent

et revertente semper anno sollemni honore celebrarent

₂₂quia in ipsis diebus se ulti sunt Iudaei de inimicis suis

et luctus atque tristitia in hilaritatem gaudiumque conversa sint

essentque istae dies

epularum atque laetitiae

et mitterent sibi invicem ciborum partes

et pauperibus munuscula largirentur

₂₃susceperuntque Iudaei in sollemnem ritum

cuncta quae eo tempore facere coeperant

et quae Mardocheus litteris facienda mandaverat

₂₄Aman enim filius Amadathi stirpis Agag

hostis et adversarius Iudaeorum

cogitavit contra eos malum ut occideret illos atque deleret

et misit phur quod nostra lingua vertitur in sortem

₂₅et postea ingressa est Hester ad regem obsecrans

ut conatus eius litteris regis irriti fierent

et malum quod contra Iudaeos cogitaverat

reverteretur in caput eius

denique et ipsum et filios eius adfixerunt cruci

₂₆atque ex illo tempore dies isti appellati sunt Phurim id est Sortium

eo quod phur id est sors in urnam missa fuerit

et cuncta quae gesta sunt

epistulae id est libri huius volumine continentur

₂₇quaeque sustinuerint et quae deinceps inmutata sint

suscepere Iudaei super se et semen suum

et super cunctos qui religioni eorum voluerint copulari

ut nulli liceat duos hos dies absque sollemnitate transigere

quam scriptura testatur et certa expetunt

tempora

annis sibi iugiter succedentibus

₂₈isti sunt dies quos nulla umquam delebit oblivio

et per singulas generationes cunctae in toto orbe provinciae celebrabunt

nec est ulla civitas

in qua dies Phurim id est Sortium non observentur a Iudaeis

et ab eorum progenie quae his caerimoniis obligata est

₂₉scripseruntque Hester regina filia Abiahil et Mardocheus Iudaeus

etiam secundam epistulam

ut omni studio dies ista sollemnis sanciretur in posterum

₃₀et miserunt ad omnes Iudaeos

qui in centum viginti septem regis Asueri provinciis

versabantur

ut haberent pacem et susciperent veritatem

₃₁observantes dies Sortium

et suo tempore cum gaudio celebrarent

sicut constituerat Mardocheus et Hester

et illi observanda susceperant a se

et a semine suo

ieiunia atque clamores et Sortium dies

₃₂et omnia quae libri huius qui vocatur Hester historia continentur