LIBER ECCLESIASTES 6

₁est et aliud malum quod vidi sub sole

et quidem frequens apud homines

₂vir cui dedit Deus divitias et substantiam et honorem

et nihil deest animae eius ex omnibus quae desiderat

nec tribuit ei potestatem Deus ut comedat ex eo

sed homo extraneus vorabit illud

hoc vanitas et magna miseria est

₃si genuerit quispiam centum

et vixerit multos annos et plures dies aetatis habuerit

et anima illius non utatur bonis substantiae suae sepulturaque careat

de hoc ego pronuntio quod melior illo sit abortivus

₄frustra enim venit et pergit ad tenebras

et oblivione delebitur nomen eius

₅non vidit solem neque cognovit distantiam boni et mali

₆etiam si duobus milibus annis vixerit et non fuerit perfruitus bonis

nonne ad unum locum properant omnia

₇omnis labor hominis in ore eius

sed anima illius non impletur

₈quid habet amplius sapiens ab stulto

et quid pauper nisi ut pergat illuc ubi est vita

₉melius est videre quod cupias quam desiderare quod nescias

sed et hoc vanitas est et praesumptio spiritus

₁₀qui futurus est iam vocatum est nomen eius

et scitur quod homo sit

et non possit contra fortiorem se in iudicio contendere

₁₁verba sunt plurima multa in disputando habentia

vanitatem